22.06.2026 | 23:26
Մեսին հաղթանակ պարգևեց Արգենտինային ու դարձավ աշխարհի առաջնությունների պատմության լավագույն ռմբարկուն. ՏԵՍԱՆՅՈՒԹ
ԱՄՆ նախազգուշացումից հետո Թուրքիան արգելափակել է ռազմական արտադրանքի արտահանումը ՌԴ․ FT
Քաղաքականություն
23.10.2024 | 14:00
Թուրքիան գաղտնի արգելել է ամերիկյան ռազմական նշանակության ապրանքների արտահանումը Ռուսաստան՝ այն բանից հետո, երբ Վաշինգտոնը նախազգուշացրել է Անկարային առևտուրը չդադարեցնելու հետևանքների մասին։ Այս մասին հայտնում է բրիտանական Financial Times-ը՝ վկայակոչելով երեք աղբյուրների, փոխանցում է DW-ի ռուսական ծառայությունը։
Աղբյուրների տեղեկություններով՝ Անկարան վերջին շաբաթներին փոփոխություններ է կատարել իր մաքսային համակարգերում՝ արգելափակելու ավելի քան չորս տասնյակ ապրանքների արտահանումը, որոնք Վաշինգտոնն ու նրա արևմտյան դաշնակիցները կենսական նշանակություն են համարում Ուկրաինայում կռվող Ռուսաստանի համար:
Թուրքիայի էլեկտրոնային մաքսային համակարգն այլևս թույլ չի տալիս «կռվի դաշտի համար ապրանքներ» ուղարկել Մոսկվա։ ԵՄ-ից նմանատիպ ապրանքներն ավելի վաղ էին արգելափակվել, հայտնել են երկու աղբյուրներ:
Լրատվամիջոցի զրուցակիցներից մեկի խոսքով՝ առևտրի սահմանափակումների մասին, որոնք առնչվում են քաղաքացիական ապրանքներին, ինչպիսիք են միկրոչիպերն ու հեռակառավարման համակարգերը, հրապարակայնորեն չեն հայտարարվել քաղաքական նկատառումներով։
Սրանք մտնում են արևմտյան արտադրության 50 «բարձր առաջնահերթ» ապրանքների ցանկում, որոնք ԱՄՆ-ը, Մեծ Բրիտանիան, ԵՄ-ն և Ճապոնիան համարել են ռուսական ռազմաարդյունաբերության համար կարևոր նշանակության: Դրանց թվում են առաջադեմ էլեկտրոնիկան, որոնք պարբերաբար հայտնաբերվում են Ուկրաինայում խոցված հրթիռներում և անօդաչու սարքերում, ինչպիսիք են պրոցեսորները և հիշողության քարտերը, ինչպես նաև հաստոցներ ու զենքի պատրաստման համար օգտագործվող այլ սարքավորումներ:
Ավելի վաղ էլ թուրքական բանկերը կտրուկ կրճատել էին բիզնեսը ռուս գործընկերների հետ այն բանից հետո, երբ Միացյալ Նահանգները նման գործարքներ իրականացնող ֆինանսական հաստատությունների դեմ պատժամիջոցների սպառնալիքի մասին հրամանագիր էր արձակել։
Ըստ լրատվամիջոցի՝ նման վարքագիծը կարող է վկայել այն մասին, որ Թուրքիան աստիճանաբար հեռանում է Մոսկվայի նկատմամբ պատժամիջոցները շրջանցելու սողանցքի իր դերից։
Ավելի վաղ հայտնի էր դարձել, որ Թուրքիան մաքսատուրքեր է սահմանում Ռուսաստանից պողպատե արտադրանքի համար։ Հետագայում ռուսական պողպատի վրա լրացուցիչ հարկ կկիրառվի 6-ից 9 տոկոսի չափով՝ կախված արտադրողից, ասվում է Թուրքիայի կառավարության որոշման մեջ։
Թարգմանությունը՝ Էմմա Չոբանյանի
