03.08.2026 | 09:32
Վեդիում 2 անչափահասի նկատմամբ հանցավոր ոտնձգություններ կատարելու վերաբերյալ քրեական վարույթի նախաքննությունն ավարտվել է
Ինչպես դեռահասները կարող են հայտնվել թմրանյութերի թակարդում. Factor TV-ի ֆիլմը՝ «Սեբաստացիում». ՏԵՍԱՆՅՈՒԹ
Հասարակություն
08.10.2024 | 20:32
«Մխիթար Սեբաստացի» կրթահամալիրում այսօր Factor TV-ի «Թակարդ N 420» ֆիլմի ցուցադրությունն էր, որին հաջորդեց բավականին բուռն քննարկում դպրոցականների և ուսուցիչների շրջանում։ Ֆիլմը, որի պրեմիերան տեղի ունեցավ օրերս, պատմում է Հայաստանում թմրանյութի ճիրաններում հայտնված երիտասարդների, թմրամիջոցների տարածման դեմ պայքարի և այդ ճանապարհին հանդիպող խոչընդոտների մասին։
Թեման զգայուն է հատկապես դեռահասների դեպքում։ 2023 թվականի տվյալներով՝ Կախվածությունների բուժման ազգային կենտրոնում հաշվառված է հոգեմետ նյութեր գործածող և կախվածություն ունեցող 7700 պացիենտ, որոնցից 7-ը դեռահաս է։
Կրթահամալիրի սաներից շատերը կարևորեցին թմրանյութերի դեմ պայքարում հատկապես ընկերների դերը։ Թեպետ այդ առումով տեսակետները տարբեր էին։
«Ընկերներն իրար մեջ շատ անկեղծ խոսակցություններ կարող են ունենալ, ընկերը կարող է ամեն ինչից խոսել, կիսվել, մինչդեռ ընտանիքի հետ չի կարող նման անկեղծ խոսակցություն ունենալ։ Ընկերն իր տարեկիցն է, իր նմանը, իրենք փոքր ժամանակվանից են միասին եղել, և այդ անկեղծությունը դրանից է բխում»,-ասում է «Մխիթար Սեբաստացի» կրթահամալիրի սան Աշոտ Խաչատրյանը։
Կրթահամալիրի հիմնադիր տնօրեն Աշոտ Բլեյանը վստահ է՝ պատկան մարմիններից բացի՝ Հայաստանում թմրանյութերի տարածման դեմ պայքարում հսկայական անելիք ունի հենց դպրոցը։
«Դպրոցները պետք է լինեն հետաքրքիր, պետք է լինեն ավելի ուժեղ ազդեցություններ, դա կլինի գիրքը, կինոն, ստեղծագործական աշխատանքը, սպորտը։ Սովորողը պետք է հետաքրքրված լինի իր կյանքով և իր ամբողջ ուշադրությունը, ներուժը կենտրոնացնի այդտեղ, հակառակ դեպքում, ձանձրացող, չիրացված մարդը հեշտ կտրվի կողմնակի ազդեցության»,- նշում է նա։
Մանրամասները՝ տեսանյութում։
Աննա Բաբաջանյան
