30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
Վրաստանն անընդունելի է համարում ԵԽԽՎ-ում Ադրբեջանի վերաբերյալ քննարկումը՝ առանց ադրբեջանական կողմի մասնակցության
Քաղաքականություն
08.10.2024 | 13:21
Վրացական պատվիրակությունն իր բողոքն է հայտնել Ադրբեջանի վերաբերյալ ընթացիկ բանավեճն առանց ադրբեջանական պատվիրակության մասնակցության Եվրոպայի խորհրդի Խորհրդարանական վեհաժողովի (ԵԽԽՎ) օրակարգում ընդգրկելու կապակցությամբ։ Այս մասին հայտարարել է ԵԽԽՎ-ում Վրաստանի պատվիրակության ղեկավար Գիվի Միկանաձեն, գրում են ադրբեջանական լրատվամիջոցները։
«Վերջերս Ադրբեջանում տեղի են ունեցել խորհրդարանական ընտրություններ։ Նորընտիր ադրբեջանական խորհրդարանին անհրաժեշտ է տեղեկատվություն տրամադրել։ Մենք նույնիսկ պատրաստ ենք հանդես գալ որպես միջնորդ այդ գործընթացում։ Եվրախորհրդի յուրաքանչյուր անդամի մասնակցությունը բանավեճին շատ կարևոր է»,- ասել է Միկանաձեն։
Նա նաև խոսել է Հայաստանի ու Ադրբեջանի միջև խաղաղության գործընթացից․ «Այդ համաձայնագիրը կարևոր է ոչ միայն Ադրբեջանի ու Հայաստանի, այլև ամբողջ Հարավային Կովկասի համար։ Խաղաղության մթնոլորտի ձևավորումը և համաձայնագրի շուտափույթ ստորագրումն արդյունավետ երաշխիքներ կստեղծեն բոլոր երկրների և, ընդհանուր առմամբ, տարածաշրջանի համար»։
Ըստ Միկանաձեի՝ Վրաստանը պատրաստ է միջնորդի դեր կատարել ցանկացած գործընթացում, որը կարող է հանգեցնել խաղաղության համաձայնագրի։
«Անհամբերությամբ սպասում ենք խաղաղության պայմանագրի շուտափույթ ստորագրմանը։ Վրաստանը միշտ հավատարիմ է այն մոտեցմանը, որում կարևոր է խաղաղությունը, և պատրաստ է իր ներդրումն ունենալ այդ գործում»,- նշել է Միկանաձեն։
Հիշեցնենք, որ հոկտեմբերի 1-ին ԵԽԽՎ-ում քննարկում է տեղի ունեցել Ադրբեջանում մարդու իրավունքների, օրենքի գերակայության և ժողովրդավարության վիճակի վատթարացման վերաբերյալ։ Հունվարի 24-ին ԵԽԽՎ-ն քվեարկությամբ որոշել էր չվավերացնել Ադրբեջանի պատվիրակության լիազորությունները։ Այս որոշմամբ Ադրբեջանի պատվիրակությունն առնվազն մեկ տարով հեռացվել է ԵԽԽՎ-ից և կարող է վերադառնալ՝ իր կանոնադրական պարտավորությունները կատարելու դեպքում։ Ադրբեջանական պատվիրակության նկատմամբ քաղաքական պատժամիջոցներ սահմանող որոշմանը կողմ էր քվեարկել 76, դեմ՝ 10 պատգամավոր, ևս 4 խորհրդարանական ձեռնպահ է մնացել։
Այս որոշումից հետո կազմակերպությունում Վրաստանի խորհրդարանի պատվիրակության ղեկավար Գիվի Միկանաձեն նամակ էր հղել ԵԽԽՎ նախագահ Թեոդորոս Ռուսոպուլոսին՝ կոչ անելով վերանայել որոշումը։
Թարգմանությունը՝ Էմմա Չոբանյանի
