26.06.2026 | 23:30
Հունիսի 29-ին Հայաստանի մի շարք հասցեներում էլեկտրաէներգիայի անջատումներ կլինեն
Փաշինյանն ու Էրդողանը հանդիպմանը «միմյանց դիրքորոշումները հասկանալու պատրաստակամություն» են ցուցաբերել. Վահան Կոստանյան
Քաղաքականություն
30.09.2024 | 11:50
Հայաստանը գոհ է Թուրքիայի հետ հարաբերությունների կարգավորման գործընթացի «դրական դինամիկայից» և պատրաստ է հարաբերությունների «ամբողջական կարգավորման»։ Այս մասին թուրքական պետական Anadolu գործակալության հետ հարցազրույցում հայտարարել է ՀՀ ԱԳ փոխնախարար Վահան Կոստանյանը։
Այս մեկնաբանությունը հնչում է Նյու Յորքում ՀՀ վարչապետ Նիկոլ Փաշինյանի և Թուրքիայի նախագահ Ռեջեփ Թայիփ Էրդողանի հանդիպումից հետո։
«Մենք ուրախ ենք Հայաստան-Թուրքիա հարաբերությունների կարգավորման դրական դինամիկայով, բայց մենք հավատում ենք, որ շատ ավելին կարելի է անել, հատկապես, երբ խոսքը վերաբերում է հարաբերությունների ամբողջական կարգավորմանը, սահմանի բացմանը և դիվանագիտական հարաբերությունների հաստատմանը»,- ասել է Վահան Կոստանյանը լրատվամիջոցին Նյու Յորքում ՄԱԿ-ի Գլխավոր վեհաժողովի շրջանակում։
Նա Փաշինյանի ու Էրդողանի բանակցությունները բնութագրել է որպես «բավական դրական», որի ընթացքում երկու առաջնորդներն էլ «միմյանց դիրքորոշումները հասկանալու պատրաստակամություն» են ցուցաբերել։ Կոստանյանը մատնանշել է նախկին պայմանավորվածություններն այնպիսի հարցերի շուրջ, ինչպիսիք են սահմանի բացումը երրորդ երկրների քաղաքացիների և դիվանագիտական անձնագիր ունեցողների համար, որը ձեռք էր բերվել 2022 թվականի հուլիսին Վիեննայում հարաբերությունների կարգավորման բանակցությունների չորրորդ փուլի ընթացքում:
«Մենք վերահաստատել ենք, որ Հայաստանը պատրաստ է։ Մենք կատարել ենք բոլոր անհրաժեշտ ենթակառուցվածքային և տեխնիկական աշխատանքների նախապատրաստումը և պատրաստ ենք անցնել համաձայնագրի իրականացմանը»,- ասել է ՀՀ ԱԳ փոխնախարարը։
Նա լավատեսություն է հայտնել ապագա համագործակցության վերաբերյալ, մասնավորապես, Կարս-Գյումրի երկաթուղու վերագործարկման հարցում, որը «տնտեսական օգուտներ կբերի ոչ միայն Հայաստանին և Թուրքիային, այլև ավելի լայն տարածաշրջանին»։
«Մենք գիտենք, որ լոգիստիկ շղթաներից շատերը ներկայում արգելափակված են կամ պատշաճ կերպով չեն գործում, և Կարս-Գյումրի երկաթգիծը կարող է նոր դարպաս դառնալ Հայաստանի համար դեպի Եվրոպա, Թուրքիայի համար՝ դեպի Կենտրոնական Ասիա, Չինաստան։ Շատ ավելին կարելի է անել, և դա կարելի է անել ավելի արագ։ Եվ ուղերձը, որ մենք միշտ փորձում ենք փոխանցել մեր տարբեր թուրք գործընկերներին, այն է, որ գործելու ժամանակը հիմա է: Լրացուցիչ ժամանակ բաց թողնելու կարիք չունենք»,- ընդգծել է Կոստանյանը։
Անդրադառնալով Հայաստանի կողմից Պաղեստին պետության ճանաչմանը՝ Կոստանյանն ասել է, որ Պաղեստինը ճանաչելու որոշումը համահունչ է իսրայելա-պաղեստինյան հակամարտությունը երկու պետությունների սկզբունքով լուծելուն Հայաստանի երկարամյա աջակցությանը։
Պատասխանելով ՄԱԿ-ի բարեփոխումների աճող անհրաժեշտության մասին հարցին՝ նա նշել է, որ «շատ պարզ է», որ բազմակողմ համակարգն ու աշխարհակարգն «այժմ ճիշտ չեն աշխատում»:
«Կա հրատապություն բարեփոխելու բազմակողմ համակարգը համաշխարհային կարգը վերականգնելու համար՝ հիմնված կանոնների վրա, որոնք կհարգվեն բոլորի կողմից»,- հայտարարել է Վահան Կոստանյանը։
Թարգմանությունը՝ Էմմա Չոբանյանի
