15.01.2025 | 23:34
Իսրայելն ու ՀԱՄԱՍ-ը հրադադարի համաձայնագիր են ստորագրել
ԵԽ-ն կոչ է անում Թուրքիային պաշտպանել դատական անկախությունը և քաղաքական ճնշումներից զերծ անաչառ արդարադատություն ապահովել
Քաղաքականություն
17.09.2024 | 23:28
Եվրոպայի խորհրդի մոնիթորինգի հանձնաժողովը մտահոգություն է հայտնել Թուրքիայում դատական համակարգի անկախության վերաբերյալ և իշխանություններին հորդորել է պահպանել դատական անաչառությունը, գրում է Stockholm center of freedom-ը։
Հունիսի 11-14-ը Թուրքիայում իրականացրած փաստահավաք առաքելությունից հետո հրապարակված գրությունում համազեկուցողներ Ստեֆան Շեննախը և Ջիլ Մորտիմերն ընդգծել են Թուրքիայի Դատավորների և դատախազների խորհրդի (HSK) հետ կապված խնդիրները: Նրանք նշել են, որ անդամների մեծամասնությունը նշանակվում կամ ազատվում է գործադիր և օրենսդիր իշխանությունների կողմից՝ խաթարելով իշխանությունների տարանջատումը։
Առաքելությունը ներառել է նաև այցելություններ Անկարայի, Ստամբուլի և Էդիրնեի բանտեր, որտեղ Շեննախը հանդիպել է հայտնի բանտարկյալների հետ, ինչպիսիք են բարերար Օսման Քավալան և քուրդ քաղաքական գործիչ Սելահաթթին Դեմիրթաշը: Երկուսն էլ մնում են բանտարկված՝ չնայած Մարդու իրավունքների եվրոպական դատարանի վճիռներին՝ նրանց ազատ արձակելու պահանջով:
«Ես խստորեն կոչ եմ արել թուրքական իշխանություններին անհապաղ միջոցներ ձեռնարկել Քավալայի և Դեմիրթաշի վերաբերյալ ՄԻԵԴ վճիռները կատարելու համար»,- ասել է Շեննախը:
Զեկույցը նաև քննադատում է թուրքական դատարանները՝ Սահմանադրական դատարանի որոշումներին դիմադրելու համար, նշվում է պետական պաշտոնյաների կողմից դատական համակարգի վրա կրկնվող հրապարակային հարձակումների մասին: Վերջին տարիներին տեղական դատարանները հաճախ են անտեսել բարձրագույն դատարանների, այդ թվում՝ Սահմանադրական դատարանի որոշումները՝ հրաժարվելով ազատ արձակել այն անձանց, որոնց ձերբակալումը համարվել է անօրինական:
Կառավարության բարձրաստիճան գործիչների կողմից հանրային քննադատությունն ավելի է թուլացրել վստահությունը դատական համակարգի նկատմամբ: Նախագահ Ռեջեփ Թայիփ Էրդողանը, օրինակ, բացահայտ քննադատել է Սահմանադրական դատարանին այն բանից հետո, երբ այն տապալել է վիճահարույց օրենքը, որը թույլ է տալիս կառավարությանը սահմանափակել առցանց բովանդակության հասանելիությունը:
Թուրքիայի հարցով համազեկուցողները նաև ընդգծել են Անկարայի կողմից քաղաքական ճնշումներից զերծ անաչառ արդարադատություն ապահովելու անհրաժեշտությունը, ինչպես նաև մտահոգություն հայտնել բանտերի գերհագեցվածության, նախնական կալանքի երկար ժամկետների և ահաբեկչության մեղադրանքով խիստ պատիժների վերաբերյալ:
