16.03.2026 | 00:04
Ըմբիշ Սուրեն Աղաջանյանը դարձել է Եվրոպայի Մ-23 չեմպիոն․ ՏԵՍԱՆՅՈՒԹ
Փաշինյանի իշխանությունը ՀՀ-ն դեպի ԵՄ տանելու կամք չունի՝ թոզ փչելով են զբաղված․ ՌԴ-ի հետ կամուրջներ չի այրի․ Հարություն Մկրտչյան․ ՏԵՍԱՆՅՈՒԹ
Քաղաքականություն
17.09.2024 | 20:00
Մինչ «Ժողովրդավարական ուժերի հարթակ»-ը ԵՄ-ին անդամակցելու հարցով ստորագրահավաք է կազմակերպում և փորձում նաև ՀՀ իշխանությանը համոզել՝ նշանակել հանրաքվե, վարչապետ Նիկոլ Փաշինյանը հայտարարում է, որ «Կառավարության կողմից իրականացվող բալանսավորված և բալանսավորման արտաքին քաղաքականությունը ոչ միայն աշխարհի մասին մեր պատկերացումները, այլև մեր մասին աշխարհի պատկերացումները էապես լավարկելու ենթատեքստ ունի»։ Նա մակերեսային է որակել առկա պատկերացումները միջազգային հարաբերությունների մասին․ «Խրիմյան Հայրիկի ավանդած պատկերացումները հարդարել ենք, փաթեթավորել ժապավեններով ու ժանյակներով, բայց աշխարհը ճանաչելու մեր մեթոդի մեջ շատ բան չենք փոխել»։
Քաղաքագետ Հարություն Մկրտչյանը, որ հանրաքվեի հարցով ստորագրահավաքի մասնակիցներից և կազմակերպիչներից է, Factor TV-ի հարցազրույցում քննադատաբար է մոտենում ՀՀ վարչապետի այս մոտեցմանը՝ պնդելով, որ այն չի համապատասխանում ՀՀ անվտանգային կարիքներին․
«Նա խոսում է բալանսավորված արտաքին քաղաքականության մասին, բայց շարունակում է ՀՀ-ն պահել ՀԱՊԿ-ում, որտեղ ունենք 2 թշնամի՝ ըստ իրեն, և նա Պուտինի զանգի արդյունքում կարող է տաքացնել մասնակցությունը։ Ի՞նչ ենք անում այնտեղ, եթե սառեցված է ՀՀ-ի մասնակցությունը և այդ դաշինքում կա երկու թշնամական պետություն։ Շատ լավ ենք անում, որ այլ տեղերից զենք ենք ստանում, բայց դա բավարար չէ։ Ինչո՞ւ Ֆրանսիայի հետ հարաբերությունները չեն թևակոխում ռազմավարական, դաշնակցային հարաբերությունների մակարդակ, ինչպիսին կա այս պահին ՌԴ-ի հետ։ Ֆրանսիան կարող է ՌԴ-ին փոխարինել մեր ռեգիոնում ամբողջությամբ։ Մենք ունենք լավ հնարավորություն՝ դաշնակցային շատ ավելի լավ փաթեթ ունենալ Ֆրանսիայի հետ, քան այսօր կա ՌԴ-ի հետ»,- նշեց քաղաքագետը։
Ռիսկերի առանցքային փունջը ՌԴ-ի հետ է կապված․ մտահոգները մի քանի ռիսկեր են նշում, որ օրինակ՝ մեկ օրում Մոսկվան կփակի Հայաստանի ապրանքների ներմուծումը կամ մեկ օրում կդադարեցնի գազի մատակարարումը, կթանկացնի այն, պատժամիջոցներ կկիրառի, եթե ՀՀ-ն ԵՏՄ-ից և ՀԱՊԿ-ից դուրս գա, և ԵՄ ուղղությամբ գնա։
Հարություն Մկրտչյանն ասում է, որ կարող են ՌԴ-ում գտնվել չինովնիկներ, որոնք պատժամիջոցների ճանապարհով գնալու կողմնակից լինեն, սակայն դա չի նշանակում, որ ՀՀ-ն պետք է մնա այդ մահակի ներքո և հարվածի տակ դնի իր ինքնիշխանությունը։ Ըստ նրա՝ քաղաքական ապահարզանի պատճառներն ավելի քան ակնհայտ են․
«Թող ԵՄ-ի անդամակցության թեկնածուի կարգավիճակ ստանալը ապահարզան նշանակի ՌԴ-ի հետ, հետո՞ ինչ։ ՌԴ-ն չի ճանաչում մեր տարածքային ամբողջականությունը, մեր զինվորներին մատաղ կանի հանուն իր կեղտոտ ռեգիոնալ շահերի, մենք չե՞նք ներկայացնի ապահարզան։ Ինչո՞ւ ՌԴ-ն կկարողանա Ադրբեջանի հետ ունենալ դաշնակցային հարաբերությունների պայմանագիր 2022 թվականի փետրվարից, ուր առանցքային կետ կար միասնական պայքար տանել «սեպարատիստներ»-ի դեմ, ինչը փայլուն կերպով իրականացրին ԼՂ-ում, և էթնիկ զտման ենթարկեցին ԼՂ-ն, ՀՀ-ն չի՞ կարող ներկայացնել ապահարզան։ Ինչո՞ւ, ՌԴ-ն ՀՀ-ի դեմ տնտեսական մտացածին սանկցիաներ կկիրառի, ՀՀ-ն չի՞ պահանջի ապահարզան ՌԴ-ից։ ՌԴ-ն ամբողջությամբ ձախողել է իր անվտանգային պարտավորությունները մեր նկատմամբ, չի բավարարում մեր որևէ պահանջ, առաջին հերթին՝ անվտանգային»։
Հարցազրույցն ամբողջությամբ՝ տեսանյութում։
Ռոբերտ Անանյան
