Հայերը պետք է պատրաստ լինեն դիմանալու ցուրտ ձմեռներին, մենք պետք է պատրաստ լինենք պահպանելու մեր աջակցությունը երկար ժամանակ․ Դեն Բաեր

Քարնեգի հիմնադրամի քաղաքական հետազոտությունների գծով ավագ փոխնախագահ, ԵԱՀԿ-ում ԱՄՆ նախկին դեսպան Դեն Բաերն ԱՄՆ Կոնգրեսի  Հելսինկյան հանձնաժողովի՝ Հայաստանին նվիրված լսումների ժամանակ հայտարարել է, որ այժմ անվտանգային իրավիճակը տարբեր է և խոստումնալից ապագա կառուցելու հնարավորություններ կան։

«Չնայած Վրաստանի հետընթացի հետ կապված հիասթափությանն ու Ադրբեջանի՝ դեպի ավտոտարիզմ գնալուն, Հայաստանում կան հուսալի ազդանշաններ, և մենք պետք է մեզ հարցնենք՝ ի՞նչ կարող են անել ԱՄՆ-ն ու ԵՄ-ն՝ աջակցելու Հայաստանի ժողովրդավարությանը, բարգավաճմանն ու երկարատև անվտանգությանը»,- նշել է Բաերը։

Ըստ նրա՝ առաջինը, որ պետք է անել, օգնելն է Հայաստանի խաղաղությանն ու հարևանների հետ հարաբերությունների կարգավորմանը։

«Քաղաքանապես ցավալի կլինի, Մոսկվան կարող է սաբոտաժի ենթարկել։ Հարաբերությունների կարգավորումը Երևանի ու Անկարայի միջև, երկարատև խաղաղությունը Հայաստանի ու Ադրբեջանի միջև բոլոր երեք երկրներին օգուտ կտա։ Եթե նախագահ Էրդողանն ու վարչապետ Փաշինյանը քաջություն ու տեսլական դրսևորեն, հարաբերությունների կարգավորումը կարող է նախորդել Ադրբեջանի հետ վերջնական խաղաղության պայմանագրին»,- հավելել է դիվանագետը։

Նա ասել է, որ ի հավելումն անվտանգային դիվիդենտների՝ Հայաստանը կդիվերսիֆիկացնի տնտեսական գործընկերներին ու կախվածությունը ՌԴ-ից։ Հայ-թուրքական սահմանի բացումը, ըստ նրա, այս առումով կփոխի խաղի կանոնները, տարածաշրջանային առևտուրը Հայաստանի, Թուրքիայի, Ադրբեջանի և Վրաստանի միջև կարող է յուրանքանչյուր երկրում նպաստել տնտեության աճին։

Երկրորդը, ըստ Դեն Բաերի, տեխնիական հմտությունների կառուցումն է, այդ թվում՝ առևտուրն ու լավ կառավարումը, գյուղատնտեսության ոլորտը, որտեղ ներդրումներն ու արդիականացումը կարող են օգնել նվազեցնել ՌԴ-ից ներկրումները։

Ըստ նրա՝ ԱՄՆ-ն պետք է ԵՄ-ի ու Հայաստանի այլ գործընկերների հետ զարգացանի երկարատև համապարփակ  անվտանգային գործընկերություն, համաձայնագրերի տեսքով, որոնք արդեն կնքվել են Ուկրաինայի հետ անցյալ տարի։

«Այս անվտանգային համաձայնագրերը հայերին կտան վստահություն, որ իրենց ղեկավարները բարդ քայլեր են անում Մոսկվայից կախվածությունը նվազեցնելու ուղղությամբ։ Մոսկվան կփորձի առաջընթացին խանգարել։ Հայերը պետք է պատրաստ լինեն դիմանալու ցուրտ ձմեռներին, մենք պետք է պատրաստ լինենք պահպանելու մեր աջակցությունը երկար ժամանակ»,- հայտարարել է Բաերը՝ նշելով, որ այն, ինչ տեղի է ունենում Ուկրաինայում, ազդեցություն է ունենում Հայաստանի, Վրաստանի, Ադրբեջանի, Մոլդովայի ժողովուրդների ապագայի վրա։