02.08.2026 | 21:08
Շոգ եղանակին՝ առավել զգոնություն. ՍԱՏՄ-ի կոչը հանրային սննդի ոլորտի ներկայացուցիչներին և միջոցառումների կազմակերպիչներին
Ինչքա՞ն հեռու կգնաս անվասայլակով․ անհաղթահարելի խոչընդոտներ՝ ամեն քայլափոխի. ՏԵՍԱՆՅՈՒԹ
Հասարակություն
10.09.2024 | 18:30
Այս տարի 60-ամյակը նշող «Ունիսոն» հասարակական կազմակերպության նախագահ Արմեն Ալավերդյանը տարիներ շարունակ գրեթե ամեն օր բախվում է խնդիրների։ Որքանո՞վ է հաշմանդամություն ունեցող անձի համար մատչելի Երևանում տեղաշարժը. այս հարցի պատասխանը ստանալու համար Factor TV-ն Ալավերդյանի հետ Արգիշտի 11/3 հասցեից գնացել է դեպի Գլաձորի համալսարան, ապա Երևանի 2800-ամյակի այգի։
Այն շենքը, որտեղ ապրում է Ալավերդյանը, նախագծով թեքահարթակներ չի ունեցել։ Հետնամուտքի թեքահարթակը հենց նրա պայքարի արդյունքում է կառուցվել։ Եթե այս մեկով վեր ու վար անել հնարավոր է, ապա շենքի մեկ այլ մուտքում կառուցված այս հարմարանքը թեքահարթակ դժվար է անվանել։
Ալավերդյանը որդու հետ հաճախ է գալիս բակում կառուցված խաղահրապարակ, սակայն ինքը ստիպված մնում է երթևեկելի գոտում։
Իսկ որքանով են խանութները, դեղատները և հանրային նշանակության այլ տարածքներ հասանելի անվասայլակով տեղաշարժվողի համար։ Շենքից ոչ շատ հեռու հերթական խոչընդոտն էր մեզ սպասում։
«Սա, օրինակ, գեղեցկության սրահ է, բազմաթիվ աստիճաններ, ինչպե՞ս կարող եմ ես դրանից օգտվել։ Սա դեղատուն է, ընդամենը մեկ մայթ, մեկ բորդյուր, բայց ինձ համար ևս մի խոչընդոտ»,- ասում է Ալավերդյանը։
Արմեն Ալավերդյանի համար այստեղ խնդիր է գնումներ կատարելը, երբեմն՝ նույնիսկ մայթով տեղաշարժվելը։ Խանութ գնալու կամ այլ ծառայություններից օգտվելու համար նա ստիպված է լինում իր թաղամասից բավական հեռու գնալ։
Իսկ ինչո՞ւ Երևանն այդպես էլ ամբողջովին հարմարեցված չէ հաշմանդամություն ունեցող անձանց ազատ տեղաշարժի համար։ Ալավերդյանի դիտարկմամբ՝ նոր կառուցվող շենքերը, հասարակական նշանակության տարածքները պետք է լիովին համապատասխանեն անվասայլակով տեղաշարժվող մարդկանց կարիքներին, իսկ արդեն իսկ առկա օբյեկտների համար բարդ չէ լուծումներ գտնել։
Մանրամասները՝ տեսանյութում։
Անի Թամրազյան
