Ալիևի օգնականը ՀՀ ԶՈւ-ի նկատմամբ սահմանափակումներ կիրառելու և ԵՄ դիտորդական առաքելությունը դադարեցնելու կոչ է արել

Միջազգային հանրությունը պետք է սահմանափակումներ կիրառի Հայաստանի զինված ուժերի նկատմամբ: Այս մասին հայտարարել է Ադրբեջանի նախագահի օգնական, նախագահականի արտաքին քաղաքականության բաժնի ղեկավար Հիքմեթ Հաջիևը։

«Ադրբեջանը չի եղել օկուպանտ երկիր։ Ադրբեջանը միշտ հետևել է միջազգային իրավունքի նորմերին ու սկզբունքներին և իր հարաբերությունները հարևան երկրների հետ հիմնել է այս չափանիշի վրա։ Բայց Հայաստանն օկուպանտ պետություն է»,- հայտարարել է Հաջիևը։

Նա նշել է, թե Իրաքի և Քուվեյթի միջև պատերազմից հետո որոշակի սահմանափակումներ են մտցվել իրաքյան բանակի զարգացման հետ կապված։

«Մենք կարծում ենք, որ նման սահմանափակումներ պետք է կիրառվեն նաև Հայաստանի զինված ուժերի նկատմամբ»,- ասել է Ալիևի օգնականը։

Ըստ նրա՝ սահմանազատման կանոնակարգը համաձայնեցված է երկու երկրների միջև, համապատասխան հիմք և շրջանակ է ստեղծվում սահմանազատման գործընթացի համար։ Այս համատեքստում էլ Հաջիևն առաջարկել է դադարեցնել ՀՀ-ում ԵՄ քաղաքացիական դիտորդական առաքելության գործունեությունը։

«Հաշվի առնելով, որ երկու երկրների միջև գործընթացն ընթանում է խաղաղության և փոխըմբռնման պայմաններում, մենք կարծում ենք, որ անհրաժեշտություն չկա, որ Եվրամիության սահմանային առաքելությունը գործի հայկական կողմից Ադրբեջանի սահմանի մոտ։ Եկել է այդ առաքելության գործունեությունը դադարեցնելու ժամանակը»,- հայտարարել է նա։

Անդրադառնալով ՀՀ վարչապետ Նիկոլ Փաշինյանի վերջին հայտարարություններին՝ Հաջիևն ասել է․ «Հայաստանի վարչապետի հայտարարությունները շատ հակասական բաներ են պարունակում, որոնք չեն արտացոլում իրականությունը, Հայաստանը ռազմականացման քաղաքականություն է վարում։ Մի շարք արևմտյան երկրներ, մասնավորապես, Ֆրանսիան, լուրջ աջակցություն են ցուցաբերում Հայաստանին ռազմականացման քաղաքականության իրականացման գործում։ Սա ծառայում է Հարավային Կովկասի  տարածաշրջանում լարվածություն ստեղծելուն»։

Արձագանքելով Նիկոլ Փաշինյանի հայտարարությանը, որ Ադրբեջանի Սահմանադրությունը տարածքային պահանջներ է պարունակում Հայաստանի նկատմամբ, Ալիևի օգնականն ասել է, թե դա այդպես չէ՝ իր հերթին կրկնելով ՀՀ Սահմադրության հետ կապված Բաքվի թեզերը։

«Հայաստանի Սահմանադրության մեջ, համաձայն Անկախության հռչակագրի, դեռևս կան տարածքային պահանջներ Ադրբեջանի նկատմամբ, այսինքն՝ Ղարաբաղի միացման դրույթը։ Մինչև այս դրույթը չփոխվի, մենք լուրջ խնդիրներ ենք տեսնում խաղաղության պայմանագրի հասնելու համար։ Ադրբեջանի Սահմանադրությունը տարածքային պահանջներ չունի որևէ պետության նկատմամբ, այն ադրբեջանական ժողովրդի արդար կամքն արտացոլող փաստաթուղթ է։ Մենք գնահատում ենք այս համեմատությունը պարզապես որպես բառախաղ: Մենք խորհուրդ ենք տալիս Հայաստանի վարչապետին և քաղաքական ղեկավարությանը՝ քայլեր ձեռնարկել իրական խաղաղության օրակարգը խթանելու և տարածաշրջանի պետությունների մասնակցությամբ խաղաղության օրակարգին աջակցելու ուղղությամբ»,- նշել է Հաջիևը։