Մեր երկրին պետք են և՛ փառատոններ ու համերգներ, և´ զվարճանք, այլապես պիտի մեզ մահացած զգանք. Ռուբեն Բաբայան

«Մեզ, միանշանակ, պետք են և´փառատոններ ու համերգներ, և´զվարճանք: Դրանք առավել ևս պետք են այն երկրներին ու ժողովուրդներին, որոնք գտնվում են մեր վիճակում: Հակառակ դեպքում` դու համակերպվելու ես այն մտքի հետ, որ մահացած ես և կատարես թշնամու ցանկությունը: Հիշենք, որ մեր Երաժշտական կոմեդիայի պետական թատրոնը բացվեց Երկրորդ համաշխարհային պատերազմի տարիներին: Մարդկանց հոռետեսական տրամադրություն ներարկելուց ո՛չ իշխանությունը, ո՛չ ընդդիմությունը չի շահելու»,-Factor TV-ի հետ զրույցում տեսակետ է հայտնում Երևանի ազգային տիկնիկային թատրոնի գեղարվեստական ղեկավար Ռուբեն Բաբայանը` պատասխանելով հարցին, թե մեր երկրին, որն այսօր կանգնած է արտաքին ու ներքին լուրջ մարտահրավերների առջև, արդյո՞ք պետք են «Ֆեստիվառներ», դիսկոտեկտներ:

Մեր զրուցակիցը շեշտում է`2020-ից հետո մեր ժողովուրդը հասկացավ, որ աշխարհում որևէ ստատիկ բան չկա և Հայաստանն էլ չունի իր համար ի սկզբանե նախատեսված տեղ այդ աշխարհում. «Փոխվում է աշխարհը, փոխվում են դաշնակիցները, և բաց աչքերով ապրելը ճիշտ է: Մեզ վախ են ներշնչել, ասել են`դուք ձեզնից բան չեք ներկայացնում, եթե չլինեն ձեզ պաշտպանող ուժերը, ձեզ կբնաջնջեն, մեր մեջ ծուլություն է ներմուծվել, որ դրա դեմ որևէ բան չանենք»,- ասում է նա:

Ռուբեն Բաբայանը խոսում է նաև անհատների մասին, որոնք նպաստում են առողջ հանրության ձևավորմանը և նկատում, որ մեր դպրոցը երկար ժամանակ չի կայացրել անհատների. «Եթե դատենք սոցցանցերից, մեր հանրությունն ապրում է ատելության մթնոլորտում, որը քաղցկեղ է: Մարդկանց պետք է քարոզել առողջ էգոիզմ, հասկացնել, որ դա առաջինն իրենց է վնասելու»:

Ռուբեն Բաբայանն անդրադառնում է մշակութային խնդիրների, մասնավորապես` «Մեկենասության մասին» օրենքին, որը թույլ կտար արվեստի ոլորտի հովանավորին խուսափել ինչ-ինչ հարկերից, այդպես էլ որևէ իշխանության օրոք Հայաստանում չի ընդունվում. «Մեկենասության մասին» օրենքը հաճախ ընկալվում է միայն ֆինանսական տեսանկյունից, բայց խնդիրը հասարակության համերաշխությունն է: Պետք է միավորել բիզնեսն ու մշակույթը, մենք ունենք իրար կարիքը:

Արվեստագետները կարիք ունեն բիզնես մտածողության և հակառակը: Այդ ֆինանսական օգնությունը պետք է գնա անհատ արվեստագետներին, անկախ խմբերին: Նրանք որքան քիչ կախված լինեն պետությունից, այնքան լավ»:

Մանրամասները`տեսանյութում:

Աննա Բաբաջանյան