Թուրքիայի խորհրդարանն ընդունել է թափառող շների սպանության վիճահարույց օրենքը՝ բողոքի ակցիաների ֆոնին

Թուրքիայի խորհրդարանը հուլիսի 30-ին ընդունել է իշխող «Արդարություն և զարգացում» կուսակցության կողմից ներկայացված թափառող շների վերաբերյալ աղմկահարույց օրինագիծը։ Թուրքական լրատավմիջոցների հաղորդմամբ՝ 594 պատգամավորներից քվեարկությանը մասնակցել է 500-ը։ Օրինագծի ընդունմանը կողմ է քվեարկել 275, դեմ՝ 224, ձեռնպահ՝ մեկ պատգամավոր։

Օրինագիծը բաղկացած է 17 հոդվածից, հինգերորդ հոդվածը ճանապարհ է հարթում թափառող շների սպանության համար։

Համաձայն նոր օրենքի՝ անասնաբույժը կարող է որոշել սպանել թափառող շներին (էվթանազիա), երբ «կենդանիներին ցավ և տառապանք պատճառող հիվանդությունները չեն կարող բուժվել», երբ «նրանց վարքագիծը վտանգ է ներկայացնում մարդկանց և կենդանիների կյանքին և առողջությանը, և նրանց բացասական վարքը չի կարող վերահսկվել», ինչպես նաև «կենդանիների սուր վարակիչ հիվանդության կանխարգելման կամ վերացման կամ մարդկանց առողջության  համար վտանգ ներկայացնող դեպքերում»։

Քվեարկությունից հետո խորհրդարանը գնացել է արձակուրդ՝ մինչև հոկտեմբերի 1-ը։

Ընդդիմադիր պատգամավորները հայտարարել են, որ «ո՛չ պատմությունը, ո՛չ մարդկությունը չեն ների «այո» քվեարկածներին»։

Մինչդեռ իշխող ԱԶԿ-ի փոխնախագահ Աբդուլլահ Գյուլերն ասել է. «Այս օրենքում սպանություն չկա, դա սուտ է։ Կա սեփականատիրության իրավունք, կա խրախուսանք»։

Օրինագիծը պահանջում է քաղաքապետարաններից հեռացնել անօթևան կենդանիներին փողոցներից և տեղավորել ապաստարաններում։ Քաղաքապետարաններից կպահանջվի նաև ստեղծել ապաստարաններ և իրականացնել «վերականգնողական» ընթացակարգեր մինչև 2028 թվականի դեկտեմբերի 31-ը։

Հիմնական ընդդիմադիր Ժողովրդահանրապետական ​​կուսակցության (CHP) առաջնորդ Օզգուր Օզելը հայտարարել է, որ իրենք օրինագիծը հետ կապված բողոք ներկայացնեն Սահմանադրական դատարան։

Խորհրդարանում օրինագծի քննարկման ժամանակ ընդդիմադիր պատգամավորները կարմիր ներկված ձեռնոցներ են կրել՝ արյուն ակնարկելով։

Կենդանիների իրավունքների պաշտպանները մի քանի օր բողոքի ակցիաներ են իրականացնում օրինագծի դեմ՝ այն անվանելով «կոտորածի օրենք»։