25.06.2026 | 17:07
Ընթացքի մեջ է Կարապետյանի` քաղաքացիություններից հրաժարվելու գործընթացը. Վարդևանյան․ ՏԵՍԱՆՅՈՒԹ
Բաքուն պատրաստվում է Պակիստանի տնտեսության մեջ 2 մլրդ դոլար ներդնել․ տարբեր ոլորտներում գործակցության շուրջ 15 փաստաթուղթ է ստորագրվել
Քաղաքականություն
12.07.2024 | 16:20
Ադրբեջանը ծրագրում է Պակիստանի տնտեսության մեջ շուրջ 2 մլրդ դոլար ներդնել։ Այս մասին Ադրբեջանի նախագահ Իլհամ Ալիևը նշել է Պակիստանի վարչապետ Շահբազ Շարիֆի հետ Իսլամաբադում կայացած բանակցություններից հետո մամուլի համար արված հայտարարությունում, գրում են ադրբեջանական լրատվամիջոցները։
«Նախատեսում ենք, որ մեր ներդրումների ընդհանուր ծավալը սկզբնական փուլում կկազմի մոտ 2 միլիարդ դոլար։ Մենք արդեն քննարկել ենք մի քանի նախագծեր էներգետիկայի, ենթակառուցվածքների, կապի և շատ այլ ոլորտներում, այդ թվում՝ պաշտպանական արդյունաբերության ոլորտում, որտեղ մենք արդեն շատ հաջող համագործակցում ենք»,- ասել է Ալիևը։
Նա ասել է, որ Բաքուն Իսլամաբադի հետ ամուր գործընկերություն է կառուցելու ոչ միայն քաղաքական, այլև տնտեսական մակարդակով։ Բացի այդ, Ալիևը հիշել է Արցախյան 44-օրյա պատերազմում Պակիստանի աջակցության մասին։
«Պակիստանը դիվանագիտական հարաբերություններ չի հաստատել Հայաստանի հետ։ 2020 թվականի նոյեմբերին հաղթանակի տոնակատարության ժամանակ մեր ժողովուրդը ձեռքին պահել է Ադրբեջանի, Պակիստանի և Թուրքիայի դրոշները։ Սա եզակի է դարձնում մեր հարաբերությունները: Այս հիմքի վրա են կառուցվել նաև մեր այսօրվա քննարկումները՝ այդ հարաբերությունները գործնական նախագծերով ամրապնդելու նպատակով»,- ասել է Ադրբեջանի ղեկավարը։
Պակիստանի վարչապետ Շահբազ Շարիֆն իր հերթին ընդգծել է այդ քննարկումների կարևորությունը՝ շեշտելով փոխադարձ վստահությունն ու հարգանքը, որոնց հիմքում ընկած են երկու երկրների հարաբերությունները։ Նա նշել է, որ չնայած ամուր քաղաքական և մշակութային կապերին՝ 100 միլիոն դոլարի առևտրի ներկայիս ծավալը չի արտացոլում իրենց գործընկերության ամբողջ ներուժը։ Այս խնդրի լուծման համար կողմերը քննարկել են 2 միլիարդ դոլարի համատեղ ներդրումային ծրագրեր, որոնք ուղղված են տնտեսական համագործակցության էապես ընդլայնմանը։
Բացի այդ, երկու երկրները ստորագրել են տարբեր ոլորտներում համագործակցության 15 փաստաթուղթ։ Մասնավորապես, միջկառավարական համաձայնագրեր են ստորագրվել տարանցիկ առևտրի, արտոնյալ առևտրի, օդային ծառայությունների, գիտության և տեխնիկայի, զբոսաշրջության, օդային ծառայությունների ոլորտում համագործակցության վերաբերյալ։ Կողմերը նաև ստորագրել են փոխըմբռնման հուշագրեր՝ հանքային ռեսուրսների և երկրաբանության, երկու երկրների արտաքին գործերի նախարարությունների միջև հյուպատոսական ոլորտում համագործակցության, պետական գույքի մասնավորեցման, արդարադատության ոլորտում փոխգործակցության, տեղեկատվական և հաղորդակցական տեխնոլոգիաների, փոքր և միջին բիզնեսի վերաբերյալ։ Ստորագրվել է նաև Բաքուն և Իսլամաբադը քույր քաղաքներ հռչակելու մասին փաստաթուղթ։
Էմմա Չոբանյան
