Կառավարությունը հարկային արտոնություն տվեց Գագիկ Ծառուկյանին պատկանող ընկերությանը. ՏԵՍԱՆՅՈՒԹ

Կառավարությունը կրկին հարկային արտոնություն է տալիս և կրկին՝ ոչ պատահական մարդկանց: «Արմօյլ» ընկերությունը հարկային արտոնություն է ստանում:

Ավելի ճիշտ՝ 2015թ. դեկտեմբերի 24-ի որոշմամբ ստացած հարկային արտոնությունները երկարաձգվում են: Դրանք վերաբերում են ապրանք ներմուծելիս ԱԱՀ-ի գումարի վճարման հետաձգմանը՝ մինչև դեկտեմբերի 24-ը:

Առաջին անգամ հարկային արտոնություն տվել էր Հովիկ Աբրահամյանի Կառավարությունը: Ցանկի սարքավորումներն ավելանում են 7-ով, գումարը՝ 179,3 մլն դրամով:

Նշենք, որ «Արմօյլ» ՓԲ ընկերությունը Կոտայքի մարզի Եղվարդ քաղաքում կառուցում է նավթամթերքի վերամշակման գործարան` բնագավառում առկա ժամանակակից սարքավորումներով: Ներդրումները կազմում են 35 մլն դոլար, որը պետք իրականացնի մի քանի փուլերով։ Ծրագրի իրագործման արդյունքում կստեղծվի մոտ 150 աշխատատեղ` միջին աշխատավարձը կազմելով 220 հազար դրամ:

Ո՞րն է այստեղ ուշագրավը: Այս տարվա հուլիսի 16-ին բնապահպանության և ընդերքի տեսչական մարմնի ղեկավար Արթուր Գրիգորյանը կայացրեց գործարանի շինարարությունը կասեցնելու մասին որոշում: Պարզվել էր, որ շինարարությունը սկսելուց առաջ «Արմօյլ» ՓԲԸ չի իրականացրել շրջակա միջավայրի վրա ազդեցության գնահատում և փորձաքննություն։ 

Շինարարությունը կասեցվում էր, մինչև թերության վերացումը։ Ընկերությունն էլ այս որոշումը համարել էր ոչ իրավաչափ՝ նշելով, որ գործարանը ենթակա չէ փորձաքննության, քանի որ քսայուղերի և բիտումի արտադրության վերաբերյալ «Շրջակա միջավայրի վրա ազդեցության գնահատման և փորձաքննության մասին» ՀՀ օրենքում ոչինչ սահմանված չէ:

Ի վերջո, տեսչական մարմինը բեկանեց իր որոշումը, և գործարանն անարգել շարունակելու է կառուցվել:

Այս գործարանի կառուցումը բավականին խորդուբորդ կերպով է ընթանում:  2016 թվականի հունիս-հուլիս ամիսներին ֆինանսական խնդիրների պատճառով գործարանի շինարարությունը դադարեցվել էր: Հետո իր օգնությունն էր առաջարկել ԲՀԿ առաջնորդ Գագիկ Ծառուկյանը: Այժմ նրան է պատկանում բաժնետոմսերի կեսը, մյուս կեսը` «Արմօյլ» ընկերությանը, որի հիմնադիրն է պարսկահայ գործարար Հենրիկ Տեր-Ղուկասյանը:

Հուլիսի 10-ին Կոտայքի մարզի Եղվարդ քաղաքի Նատի թաղամասի բնակիչներն ու նույն թաղամասում գտնվող չրի արտադրամասի աշխատակիցները փակել էին Եղվարդ-Երևան մայրուղին՝ պահանջելով կասեցնել գործարանի կառուցումը: Սա առաջին անգամ չէ, որ բողոքի ցույց է տեղի ունենում:  Ու նաև առաջին անգամը չէ, որ շինաշխատանքները կասեցվում են:

2017թ. հոկտեմբերի 26-ին բնապահպանության նախարարության բնապահպանության և ընդերքի տեսչական մարմինը դադարեցրել էր գործարանի շինարարությունը՝ նույն հիմքով, ինչ-որ երկրորդ անգամ:

Այնուամենայնիվ, գործարանը շարունակեց աշխատանքները: Իսկ այժմ, պաշտոնապես չունի որևէ խոչընդոտ՝ աշխատանքները շարունակելու:

Փաստորեն, Գագիկ Ծառուկյանը ստացավ արտոնությունը: Իհարկե, ուշագրավ է, որ 179,3 մլն դրամի սարքավորման ներմուծման համար ԱԱՀ վճարելու հարցում Ծառուկյանը խնդիր ունի:

Մանրամասները՝ տեսանյութում: