Ո՛չ վերականգնվեց, ո՛չ թանգարան դարձավ. Արամ Մանուկյանի տունը շարունակում է փլատակ մնալ. ՏԵՍԱՆՅՈՒԹ

Օրերս նշվեց Հայաստանի առաջին հանրապետության հիմնադրման 106-ամյակը: Հիմնադիրներից Արամ Մանուկյանն ապրել է Արամի 9 հասցեի շենքում: Այն, սակայն, տարիներ շարունակ գտնվում է անմխիթար վիճակում, և չնայած քննադատություններին ու խոստումներին, պատկերը, միևնույն է, չի փոխվում:

Շենքը հանրապետական նշանակության հուշարձան է և ընդգրկված է Երևան քաղաքի պատմության և մշակույթի անշարժ հուշարձանների ցանկում: Դրա վերակառուցման հարցը ներառված է «Հին Երևան» ծրագրում: Այս և ծրագրում ներառված շուրջ մեկ տասնյակ կառույցների սեփականատերը 2015-ից շվեյցարահայ գործարար Վարդան Սըրմաքեշն է։

«Արամ Մանուկյանի տունը Երևանում պահպանված քիչ թվով նախաթամանյանական ժամանակաշրջանի կառույցներից է։ Շենքը կառուցվել է Բորիս Մեհրաբյանի նախագծով, 20-րդ դարի սկզբին, և բացի այն, որ այդտեղ ապրել է Մանուկյանը, այն արժեքավոր է նաև նրանով, որ ներկայացնում է ժամակաշրջանի շերտը։ Քաղաքական կամքն է պակասում, որպեսզի շենքը պահպանվի»,-նշում է ճարտարապետ Տիգրան Գալստյանը։

Պատմաբան, Արամ Մանուկյանի մասին գրքի հեղինակ Արմեն Ասրյանն այն համոզման է, որ շենքի անմիթար վիճակն ուղիղ կերպով արտացոլում է մեր վերաբերմունքը պետականությանը: Նա շեշտում է Արամ Մանուկյան գործչի ավանդը հայ ժողովրդի ուժերը միավորելու հարցում․ «Թերևս ամենից վառ օրինակները Վանի 1915-ի հերոսամարտն ու 1918-ին Հայաստանի առաջին հանրապետության ստեղծումն են»,-ասում է նա։

Ըստ մասնագետի՝ նման նշանակության պատմամշակութային հուշարձանը շատ այլ երկրներում կպահպանվեր առանձնահատուկ կերպով, ավելին` շենքը կարող էր վերածվել թանգարանի: Factor TV-ն ԿԳՄՍ նախարարությունից հետաքրքրվեց` այդ ուղղությամբ արդյոք տարվում են աշխատանքներ և ինչ դիրքորոշում ունի այդ հարցում կառույցը:

Նախարարությունից մեզ պատասխանեցին, որ Արամ Մանուկյանի տունն ընդգրկված է «Հին Երևան» ծրագրում, որը դեռևս 2005-ից հաստատվել է Կառավարության մի շարք որոշումներով։ Ըստ ԿԳՄՍ նախարարության գիտամեթոդական խորհրդի հավանությունն արժանացած նախագծի՝ պահպանվելու և վերականգնվելու է այժմ գոյություն ունեցող շենքի ճակատային հատվածը: Տիգրան Գալստյանը, սակայն, շեշտում է`ֆասադի պահպանումը դեռևս շենքի պահպանումը չէ: Նա նշում է, որ ուսումնասիրել է նմանատիպ գործընթացներում տարբեր երկրների փորձը:

Մանրամասները՝ տեսանյութում։

Աննա Բաբաջանյան