Թուրքիայում մեծամասնությունը չի վստահում դատական համակարգին․ հարցում

Թուրքիայում մարդկանց ավելի քան 67 տոկոսը չի վստահում երկրի դատական ​​համակարգին։ Այս մասին են վկայում ASAL Research-ի վերջին հարցման արդյունքները, գրում է Turkish Minute-ը։

«Թուրքիայի քաղաքական օրակարգ․ 2024 թվականի ապրիլ» հարցման մեջ, որն անցկացվել է 2000 մարդկանց շրջանում երկրի 26 նահանգներում, հարցվածներին հարցրել են․ «Վստահություն ունե՞ք Թուրքիայի դատական ​​համակարգի նկատմամբ»: Մինչ մասնակիցների 67,7 տոկոսը նշել է, որ չի վստահում Թուրքիայի դատական ​​համակարգին, 24,5 տոկոսը նշել է, որ վստահում է: Մնացած 7,8 տոկոսը կարծիք չի ունեցել։

Թուրքիայի դատական ​​պաշտոնյաները հաճախ բախվում են կոռուպցիայի և կաշառակերության մեղադրանքների, ինչպես նաև լայնածավալ քննադատության՝ նախագահ Ռեջեփ Թայիփ Էրդողանի «Արդարություն և զարգացում» կուսակցության կառավարության իշխանության ներքո անկախության բացակայության համար:

Էրդողանին մեղադրում են դատական ​​համակարգի նկատմամբ բացարձակ վերահսկողություն իրականացնելու մեջ՝ շնորհիվ նախագահական կառավարման համակարգի կողմից իրեն տրված հսկայական լիազորությունների։

Փաստաբանների միջազգային ասոցիացիայի Մարդու իրավունքների ինստիտուտի (IBAHRI) և The Arrested Lawyers Initiative-ի (TALI) կողմից համատեղ մշակված փետրվարի զեկույցը բացահայտել էր, թե ինչպես են իրավաբանները թիրախավորվում Թուրքիայում անարդար դատավարությունների, կամայական կալանավորումների, բանտարկությունների և ոտնձգությունների միջոցով, և ինչպես է չարաշահվում երկրի հակաահաբեկչական օրենսդրությունը՝ փաստաբաններին իրենց օրինական աշխատանքի համար հետապնդելու նպատակով:

Զեկույցի համաձայն՝ 2016 թվականի հուլիսի 15-ի հեղաշրջման փորձից հետո ավելի քան 1700 փաստաբան ենթարկվել է քրեական պատասխանատվության, այդ թվում՝ 700-ը՝ ձերբակալվել։

Էմմա Չոբանյան