Հասարակություն
11.05.2024 | 20:00Այս տարվա մարտի վերջից «Գոյ» թատրոնի դռները փակ են դերասանների առաջ, նրանք չեն կարողանում ներս մտնել ու փորձեր անել։ Այդ ընթացքում «Գոյ»-ի կառավարման խորհրդի նախագահ Սարգիս Արզումանյանը նույնիսկ անժամկետ նստացույց արեց։ Իսկ պատճառը Կառավարության որոշումն է՝ «Գոյ» թատրոնը Գ. Սունդուկյանի անվան ազգային ակադեմիական թատրոնին միավորելու մասին, սակայն «Գոյ»-ի դերասանական ու ստեղծագործական կազմը դեմ է դրան։
Հիմա արդեն, ըստ Արզումանյանի, ԿԳՄՍ նախարարությունը համաձայն է, որ «Գոյ»-ը դառնա մասնավոր և գործի այդ հիմունքներով: Ասում է՝ տեղի է ունեցել հանդիպում ԿԳՄՍ նախարար Ժաննա Անդրեասյանի, իր, Աշոտ Տեր-Մաթևոսյանի, Տիկնիկային թատրոնի գեղարվեստական ղեկավար Ռուբեն Բաբայանի և մի քանի պատգամավորների մասնակցությամբ․ «Յուրաքանչյուրս հայտնել ենք մեր դիրքորոշումը, անհանգստություններն ու մտահոգությունները։ Նախարարն ասաց, որ պատրաստվում է ծրագիր մշակել և ուղարկել կառավարություն, որ «Գոյ»-ն այսուհետ լինի անկախ թատրոն»։
Սարգիս Արզումանյանի խոսքով՝ այս պահին քննարկումներ են ընթանում, թե պետությունն ինչ կերպ է աջակցելու մասնավոր թատրոնին: Քանի որ վերջին շրջանում Սունդուկյան թատրոնի ղեկավարության և «Գոյ»-ի անձնակազմի միջև հարաբերությունները բավական լարված են, հարցրինք՝ ինչպե՞ս են պատկերացնում հետագա համակեցությունը նույն տանիքի տակ:
«Մեր թատրոնը 35 տարի Սունդուկյան թատրոնի շենքում ստեղծագործել է։ Ճիշտ է, հիմա լարված իրավիճակ է Սունդուկյանի տնօրինության հետ, բայց երկու կողմերով էլ պետք է շարունակենք մեր համակեցությունը նույն շենքում, ցանկալի է՝ լավ հարաբերություններով շարունակենք»,- նշում է «Գոյ»-ի դերասան Աշոտ Տեր-Մաթևոսյանը։
Ինչ վերաբերում է մասնավորեցման գործընթացի հետ կապված անցումային փուլին, Արզումանյանը նշում է, որ նախարարությունը մեկ տարվա ֆինանսավորում է հատկացնելու թատրոնին, սակայն Սունդուկյան թատրոնի խողովակով։ Արդեն որպես անկախ թատրոն, ըստ նրա, «Գոյ»-ը հանդես է գալու 2025-ից և մնալու է իր տեղում՝ նույն շենքում։
Ռուբեն Բաբայանն էլ պատմում է, որ հանդիպման ժամանակ առաջարկել է «Գոյ»-ին վերադառնալ ակունքներին և հանդես գալ որպես էքսպերիմենտալ լաբորատորիա, որը Երևանի թատրոնի և կինոյի պետական ինստիտուտի սաներին կկապի Հայաստանի թատրոնների հետ․ «Կարծում եմ, որ մասնավորեցումը տարբերակներից մեկն է, նախարարությունը պետք է ընտրի՝ որ տարբերակով պետք է աշխատեն։ Բայց որպեսզի մասնավոր թատրոնները արդյունավետ աշխատեն, անհրաժեշտ են համապատասխան օրենսդրական նախաձեռնություններ և ակտեր։ Առաջին հերթին պետք է ընդունել «Մեկենասության մասին» օրենքը»։
Մանրամասները՝ տեսանյութում։
Աննա Բաբաջանյան
