Բաքվի դեմ ԱՄՆ Կոնգրեսի պատժամիջոցների ցուցակում է Ադրբեջանի ԳՇ պետը

Ադրբեջանի 41 պաշտոնյաներից բաղկացած ցուցակում, որոնց դեմ ԱՄՆ Կոնգրեսն առաջարկում է պատժամիջոցներ կիրառել, երեք նոր անուններ են ավելացվել։

Մի խումբ կոնգրեսականներ՝ Դինա Տիտուսի գլխավորությամբ, անցյալ շաբաթ Ներկայացուցիչների պալատ են ներկայացրել օրինագիծ (HR8141), որը նախատեսում է պատժել Ադրբեջանի բարձրաստիճան պաշտոնյաներին մարդու իրավունքների խախտման և Արցախում ռազմական գործողությունների համար։

«Ներկայացրեցի Ադրբեջանի պատժամիջոցների վերանայման ակտը՝ Արցախում հայերի էթնիկ զտումներից և քաղաքական ընդդիմության դաժան ճնշումներից հետո ադրբեջանցի 44 պաշտոնյաների դեմ գործողություններ ձեռնարկելու համար: Միացյալ Նահանգները պետք է ամուր դիրք գրավի Հայոց ցեղասպանության դեմ»,- X-ում գրել է Տիտուսը։

Այս օրինագիծը շարունակում է աջակցություն ստանալ Կոնգրեսի անդամների շրջանում։ Մինչ օրս համահեղինակների թիվը 21-ից հասել է 27-ի։

Ադրբեջանական Թուրան գործակալությունը, վկայակոչելով իր աղբյուրներին, ավելի վաղ ներկայացրել էր 41 ադրբեջանցի պաշտոնյաների անունները։ Այժմ լրատվամիջոցը պարզել է ևս երեք նոր անուններ՝ Ադրբեջանի ԶՈՒ ԳՇ պետ Քերիմ Վելիևը, Գլխավոր դատախազության քննչական վարչության պետ Նեյմաթ Ավազովը, Բաքվի Նասիմի շրջանային դատարանի դատավոր Ազեր Տագիևը։

Անցյալ շաբաթ Կոնգրեսում ներկայացվելուց հետո օրինագիծն ուղարկվել է Արտաքին հարաբերությունների և դատական ​​հարցերի հանձնաժողովներին։ Այլ գործողություններ դեռևս չեն ձեռնարկվել։ Եթե ​​օրինագիծն ընդունվի, Կոնգրեսը կպահանջի նախագահ Ջո Բայդենի վարչակազմից պատժամիջոցներ կիրառել ադրբեջանցի պաշտոնյաների դեմ Մագնիտսկու ակտի համաձայն՝ Ադրբեջանում քաղաքական ընդդիմության դաժան ճնշումների և Արցախում ռազմական գործողությունների համար:

Օրինածում ներկայացված ադրբեջանցի պաշտոնյաները Պաշտպանության նախարարության, Գլխավոր դատախազության, Բաքվի ծանր հանցագործությունների դատարանի, Ներքին գործերի նախարարության, Պետական ​​անվտանգության ծառայության, Քրեակատարողական ծառայության, Պետական ​​սահմանային ծառայության և նախագահի աշխատակազմի ներկայացուցիչներն են։

Ցանկում են, մասնավորապես, Ադրբեջանի հատուկ նշանակության ուժերի նակին հրամանատար, այժմ ցամաքային զորքերի հրամանատար, պաշտպանության փոխնախարար, գեներալ-լեյտենանտ Հիքմեթ Միրզոևը, ռազմական ոստիկանության պետ, փոխգնդապետ Էլգյուն Ալիևը, Ադրբեջանի 218-րդ կոմանդո-բրիգադի հրամանատար, գնդապետ Էլշան Սանաևը, Ադրբեջանի ցամաքային զորքերի նախկին հրամանատար, գեներալ-լեյտենանտ Անվար Աֆանդիևը, Պետանվտանգության ծառայության ղեկավար Ալի Նագիևը, նախագահ Իլհամ Ալիևի աշխատակազմի ղեկավար Սամիր Նուրիևը և այլ պաշտոնյաներ։

Էմմա Չոբանյան