23.11.2024 | 00:35
Թրամփի հետ հեռախոսազրույցը տեղեկատվական էր, բայց նաև շատ պոզիտիվ. Փաշինյան. ՏԵՍԱՆՅՈՒԹ
Իրանի կողմից ատոմային ռումբ ստեղծելուն «շաբաթներ» են մնացել․ ՄԱԳԱՏԷ-ի ղեկավար
Քաղաքականություն
23.04.2024 | 15:53
Իրանին «շաբաթներ, այլ ոչ թե ամիսներ» են բաժանում ատոմային ռումբ ստեղծելու համար հարստացված ուրանի բավարար քանակություն ունենալուց: Այս մասին DW-ին տված հարցազրույցում ասել է Ատոմային էներգիայի միջազգային գործակալության (ՄԱԳԱՏԷ) գլխավոր տնօրեն Ռաֆայել Գրոսսին։
Թեև Իրանի ուրանի հարստացման մակարդակը, որը գրեթե հասնում է միջուկային զենք ստեղծելու համար անհրաժեշտ մակարդակին, մտահոգություններ է առաջացնում, չի կարելի եզրակացնել, որ Իրանն արդեն ունի նման զենք, հավելել է Գրոսսին։ ՄԱԳԱՏԷ-ի ղեկավարի խոսքով՝ գործող միջուկային մարտագլխիկի ստեղծումը, հարստացված ուրանի արտադրությունից բացի, պահանջում է «շատ այլ բաներ», օրինակ՝ փորձարկումներ։
Իրանի հավաստիացումները, որ երկրին միջուկային տեխնոլոգիաներ են անհրաժեշտ «բժշկական և քաղաքացիական» նպատակների համար, առաջացնում են հավելյալ հարցեր, ասել է Գրոսսին։ Օրինակ՝ ինչի՞ն են պետք հարստացված ուրանի «նման ծավալներ» և դրա արտադրության «նման արագությունը» այդ նպատակների համար։ Նման մտահոգությունները, Գրոսսիի խոսքով, ավելի են խորանում այն փաստով, որ ՄԱԳԱՏԷ-ն չունի իր իրանցի գործընկերների գործունեության «անհրաժեշտ տեսանելիության մակարդակը»:
Լրագրողի հարցին՝ հնարավո՞ր է, որ Իրանն արդյունավետորեն միջուկային զենք է մշակում, և ՄԱԳԱՏԷ-ն չգիտի այդ մասին, Գրոսսին պատասխանել է, որ «չի կարող ենթադրություններ անել» տեղեկատվության պակասի պատճառով:
Հարցազրույցի ընթացքում ՄԱԳԱՏԷ-ի ղեկավարը նաև նշել է, որ ՀԱՄԱՍ-ի հետ Իսրայելի պատերազմի, ինչպես նաև Ուկրաինայի դեմ Ռուսաստանի պատերազմի համատեքստում կա միջուկային օբյեկտների վրա հարձակումների հետ կապված խոսակցությունները նորմալ դարձնելու «տագնապալի միտում», ինչպես դա եղել է ռուսական զորքերի կողմից գրավված Զապորոժիեի ատոմակայանի, կամ նույնիսկ միջուկային զենքի կիրառման սպառնալիքների մասին, որոնք Իսրայելի կառավարությունը հնչեցրել է ՀԱՄԱՍ-ի հետ պատերազմի սկզբում: Դա, ըստ Գրոսսիի, հանգեցնում է միջուկային զենքի չտարածման ռեժիմի աստիճանական ոչնչացմանը, որը թույլ է տվել խուսափել միջուկային պատերազմից վերջին 70 տարիների ընթացքում:
