14.12.2024 | 17:18
Երևանի 4 վարչական շրջանում փոշու պարունակությունը գերազանցել է սահմանային թույլատրելի կոնցենտրացիան
Թուրքիան, Իրաքը, ԱՄԷ-ն և Կատարը Հնդկաստանին մրցակից «Զարգացման ճանապարհի» համաձայնագիր են ստորագրել
Քաղաքականություն
23.04.2024 | 13:42
Թուրքիայի նախագահ Ռեջեփ Թայիփ Էրդողանի՝ 13 տարվա ընթացքում Իրաք կատարած առաջին այցի շրջանակում համաձայնագիր է ստորագրվել Թուրքիայի, Իրաքի, Կատարի և Արաբական Միացյալ Էմիրությունների միջև Իրաքը Եվրոպային կապող խոշոր տրանսպորտային նախագծի վերաբերյալ:
Թուրքական լրատվամիջոցների հաղորդմամբ՝ նախօրեին Բաղդադում ստորագրվել է քառակողմ 4 փոխըմբռնման հուշագիր «Զարգացման ճանապարհ» ծրագրի շրջանակում համագործակցության վերաբերյալ։ Ստորագրման արարողությունը տեղի է ունեցել Էրդողանի ու Իրաքի վարչապետ Մուհամեդ Շիա ալ-Սուդանիի ներկայությամբ։
Արարողությանը մասնակցել են նաև Թուրքիայի տրանսպորտի և ենթակառուցվածքների նախարար Աբդուլքադիր Ուրալօղլուն, Իրաքի տրանսպորտի նախարար Ռեզակ Մուհեյբիսը, Կատարի տրանսպորտի և կապի նախարար Քասիմ բեն Սեյֆ ալ-Սուլեյիթին և ԱՄԷ էներգետիկայի և ենթակառուցվածքների նախարար Սուհեյլ Մուհամմեդ ալ-Մեզրուին։
Կատարը և ԱՄՆ-ն 20 միլիարդ դոլար արժողությամբ տրանսպորտային կապի երկու պոտենցիալ հովանավորներն են, որն անցնում է 1275 կիլոմետր (792 մղոն) Իրաքի նավթով հարուստ հարավային Բասրա նահանգից մինչև Թուրքիա՝ ավտոմոբիլային և երկաթուղային ճանապարհով, այնտեղից էլ՝ Եվրոպա։
Անկարան և Բաղդադը վերջին ամիսներին սկսել էին ավելի լրջորեն քննարկել առաջարկը Գազայի հատվածում պատերազմի և Եմենից հութիների հարձակումների հետևանքով Կարմիր ծովի և Սուեզի ջրանցքի շուրջ առաջացած ռիսկերի մեծացման պատճառով:
Այսպիսով, Անկարան փորձում է այլընտրանք ստեղծել ԱՄՆ-ի նախաձեռնությամբ ստեղծված Մերձավոր Արևելք-Հնդկաստան առևտրային միջանցքին, որտեղ Թուրքիան ընդգրկված չէ։ Միջանցքի վերաբերյալ փոխըմբռնման հուշագիրը ստորագրել էին ԵՄ-ն, Հնդկաստանը, Սաուդյան Արաբիան, ԱՄԷ-ն, ԱՄՆ-ը և մյուս գործընկերները՝ նախորդ տարի Հնդկաստանում տեղի ունեցած G20-ի գագաթնաժողովին։
Միաժամանակ, Էրդողանի և Իրաքի վարչապետի հանդիպումից հետո երկու երկրների միջև համագործակցության 26 համաձայնագիր է ստորագրվել։
Էմմա Չոբանյան
