Բաքուն պետք է զիջումների գնա ԵԽԽՎ վերադառնալու համար․ Ադրբեջանի հարցով համազեկուցող

Եվրոպայի խորհրդի խորհրդարանական վեհաժողովի Ադրբեջանի հարցով համազեկուցող, նորվեգացի պատգամավոր Լիզ Քրիստոֆերսենը հայտնել է, որ Նախարարների կոմիտեում բանակցություններ են ընթանում Ադրբեջանի՝ ԵԽԽՎ վերադառնալու հարցի հետ կապված։

«Մենք ցանկանում ենք տեսնել Ադրբեջանին Վեհաժողովում, բայց դրա համար Ադրբեջանի իշխանությունները պետք է որոշակի զիջումների գնան»,- ասել է Քրիստոֆերսենը VOA-ի ադրբեջանական ծառայության հետ զրույցում։

Հարցին՝ որո՞նք են այդ զիջումները և ի՞նչ պայմաններ պետք է առաջադրի ԵԽԽՎ-ն, պատգամավորը պատասխանել է, որ Ադրբեջանի իշխանությունները պետք է համագործակցեն Վեհաժողովի հետ և պայմաններ ստեղծեն համազեկուցողների համար երկրում ազատ աշխատելու, այդ թվում՝ բանտեր այցելելու համար։ Ադրբեջանը նաև պետք է կատարի իր պարտավորությունները մարդու իրավունքների ոլորտում։

Երբ անցյալ տարվա հունիսի 3-7-ին Ադրբեջանի հարցով մոնիթորինգի հանձնաժողովի համազեկուցողներն այցով Բաքվում էին, նրանց թույլ չեն տվել այցելել քաղաքական դրդապատճառներով բանտարկված անձանց։ Լիզ Քրիստոֆերսենը պատմել է, որ թեև Ադրբեջանի արդարադատության նախարարն իրենց տեղեկացրել է, որ հաջորդ այցի ժամանակ հնարավորություն կտրվի այցելել բանտեր, սակայն անցյալ տարվա նոյեմբերի 20-21-ի այցի ընթացքում կրկին թույլ չեն տվել։ Բացի այդ, Ադրբեջանի հարցով երկու համազեկուցողներին՝ Հաննա Բարդելին ու Փոլ Գավանին, ընդհանրապես թույլ չեն տվել մուտք գործել երկիր։

Նա նաև նշել է, որ կարևոր է լուծել Ադրբեջանի մասին զեկույցում նշված մի շարք մտահոգիչ խնդիրները և հավելել, որ այն կարող են քննարկել ԵԽԽՎ ադրբեջանական պատվիրակության վերադարձից հետո։

Ապրիլի 15-ից մեկնարկել է ԵԽԽՎ գարնանային նստաշրջանը, որին Ադրբեջանը չի մասնակցում։ Ձմեռային նստաշրջանի ընթացքում՝ հունվարի 24-ին, ԵԽԽՎ-ն քվեարկությամբ որոշել է չվավերացնել Ադրբեջանի պատվիրակության լիազորությունները։ Այս որոշմամբ Ադրբեջանի պատվիրակությունն առնվազն մեկ տարով հեռացվել է ԵԽԽՎ-ից և կարող է վերադառնալ՝ իր կանոնադրական պարտավորությունները կատարելու դեպքում։ Ադրբեջանական պատվիրակության նկատմամբ քաղաքական պատժամիջոցներ սահմանող որոշմանը կողմ էր քվեարկել 76, դեմ՝ 10 պատգամավոր, ևս 4 խորհրդարանական ձեռնպահ էր մնացել։

Էմմա Չոբանյան