ՀՀ-ի և ԱՄԷ-ի միջև քաղաքացիների մուտքի արտոնագրին վերաբերող փոխըմբռնման հուշագրում փոփոխությունները համապատասխանում են Սահմանադրությանը․ ՍԴ

Սահմանադրական դատարանը հրապարակել է որոշում, համաձայն որի՝  2023 թվականի սեպտեմբերի 7-ին ստորագրված «Հայաստանի Հանրապետության կառավարության և Արաբական Միացյալ Էմիրությունների կառավարության միջև 2009 թվականի հունիսի 21-ին՝ դիվանագիտական անձնագրեր ունեցող անձանց մուտքի արտոնագիր ստանալու պահանջից ազատելու մասին Փոխըմբռնման հուշագրում փոփոխություններ կատարելու մասին» արձանագրությամբ ամրագրված պարտավորությունները համապատասխանում են Սահմանադրությանը:

Ուսումնասիրելով վերոնշյալ արձանագրությունը, հետազոտելով սույն գործով
Կառավարության ներկայացուցչի գրավոր բացատրությունը և գործում առկա մյուս
փաստաթղթերը՝ Սահմանադրական դատարանը Պ Ա Ր Զ Ե Ց .

1. «Հայաստանի Հանրապետության կառավարության և Արաբական Միացյալ
Էմիրությունների կառավարության միջև 2009 թվականի հունիսի 21-ի՝ դիվանագիտական անձնագրեր ունեցող անձանց մուտքի արտոնագիր ստանալու պահանջից
ազատելու մասին» Փոխըմբռնման հուշագիրը (այսուհետ՝ Փոխըմբռնման հուշագիր)
գործում է 2010 թվականի հունվարի 14-ից:

2. 2023 թվականի սեպտեմբերի 7-ին Աբու Դաբիում՝ Հայաստանի Հանրապետության կառավարության և Արաբական Միացյալ Էմիրությունների կառավարության միջև (այսուհետ՝ Կողմեր) ստորագրվել է Փոխըմբռնման հուշագրում փոփոխություններ կատարելու մասին արձանագրությունը (այսուհետ՝ Արձանագրություն)՝
երկու երկրների միջև զբոսաշրջիկների հոսքերի ավելացման, գործարար և
առևտրական կապերի ամրապնդման, կրթամշակութային, հումանիտար, առողջապահական և այլ ոլորտներում համագործակցության խորացման, ինչպես նաև
երկկողմ հարաբերությունների հետագա զարգացման նպատակով:

3. Արձանագրությամբ Փոխըմբռնման հուշագրի անվանումը շարադրվում է
հետևյալ խմբագրությամբ.
«Փոխըմբռնման հուշագիր Հայաստանի Հանրապետության կառավարության և
Արաբական Միացյալ Էմիրությունների կառավարության միջև քաղաքացիների
մուտքի արտոնագիր ստանալու պահանջից ազատելու մասին»:

4. Արձանագրության համաձայն՝ մուտքի արտոնագիր ստանալու պահանջից
ազատված անձնագրեր են համարվելու երկու երկրների վավերական՝ դիվանագիտական, հատուկ, պաշտոնական և սովորական անձնագրերը: Կողմերը կթույլատրեն դիվանագիտական, հատուկ, պաշտոնական և սովորական՝ 6 ամսից ոչ
պակաս վավերականության ժամկետով անձնագրեր ունեցող իրենց քաղաքացիներին մուտք գործել, դուրս գալ և տարանցմամբ տեղաշարժվել իրենց համապատասխան երկրների տարածքներով՝ առանց մուտքի արտոնագրի և վճարի: Բացի
դրանից, նշված անձնագրերն ունեցող Կողմերի քաղաքացիներին թույլատրվելու է
գտնվել մյուս կողմի երկրի տարածքում առավելագույնը 90 օր ժամկետով:

5. Արձանագրությամբ Հայաստանի Հանրապետությունը փոխադարձության
հիման վրա ստանձնում է հետևյալ պարտավորությունները.
5.1. մուտքի արտոնագիր ստանալու պահանջից ազատված անձնագրեր համարել Արաբական Միացյալ Էմիրությունների վավերական՝ դիվանագիտական,
հատուկ, պաշտոնական և սովորական անձնագրերը,
5.2. թույլատրել դիվանագիտական, հատուկ, պաշտոնական և սովորական՝ 6
ամսից ոչ պակաս վավերականության ժամկետով անձնագրեր ունեցող Արաբական
Միացյալ Էմիրությունների քաղաքացիներին մուտք գործել, դուրս գալ և տարանցմամբ տեղաշարժվել Հայաստանի Հանրապետության տարածքով՝ առանց մուտքի
արտոնագրի և վճարի,
5.3. թույլատրել դիվանագիտական, հատուկ, պաշտոնական և սովորական
անձնագրերն ունեցող Արաբական Միացյալ Էմիրությունների քաղաքացիներին
գտնվել Հայաստանի Հանրապետության տարածքում առավելագույնը 90 օր ժամկետով:

6. Սահմանադրական դատարանը գտնում է, որ Արձանագրությամբ Հայաստանի Հանրապետության ստանձնած պարտավորությունները համահունչ են Սահմանադրության 13-րդ հոդվածով ամրագրված՝ միջազգային իրավունքի հիման վրա՝
բոլոր պետությունների հետ բարիդրացիական, փոխշահավետ հարաբերությունների
հաստատմանն ուղղված՝ արտաքին քաղաքականության իրականացման նպատակներին:
Ելնելով գործի քննության արդյունքներից և ղեկավարվելով Սահմանադրության 168-րդ հոդվածի 3-րդ կետով, 170-րդ հոդվածի 1-ին և 4-րդ մասերով, «Սահմանադրական դատարանի մասին» սահմանադրական օրենքի 63, 64 և 74-րդ հոդվածներով՝ Սահմանադրական դատարանը Ո Ր Ո Շ Ե Ց.

1. 2023 թվականի սեպտեմբերի 7-ին ստորագրված «Հայաստանի Հանրապետության կառավարության և Արաբական Միացյալ Էմիրությունների կառավարության միջև 2009 թվականի հունիսի 21-ին՝ դիվանագիտական անձնագրեր ունեցող
անձանց մուտքի արտոնագիր ստանալու պահանջից ազատելու մասին Փոխըմբռնման հուշագրում փոփոխություններ կատարելու մասին» արձանագրությամբ ամրագրված պարտավորությունները համապատասխանում են Սահմանադրությանը:

2. Սահմանադրության 170-րդ հոդվածի 2-րդ մասի համաձայն՝ սույն որոշումը
վերջնական է և ուժի մեջ է մտնում հրապարակման պահից։