Բարձրագույն կրթություն ունեցողների շուրջ 15 %-ը աղքատ է

Հայաստանում 2022 թվականին աղքատների թիվը նվազել է՝ կազմելով 24,8 % նախորդ տարվա 26,5 %-ի փոխարեն։ Այս մասին Factor.am-ը տեղեկանում է ՀՀ վիճակագրական ծառայության հրապարակած տվյալներից։

2022 թվականին աղքատության միջին գիծը համարվել է 52 հազար 883 դրամ։ Այսինքն՝ այն բնակիչները, որոնց եկամուտը մոտ է այս թվին, համարվել են աղքատ։

Ծայրահեղ աղքատ են համարվում այն բնակիչները, որոնց ամսական եկամուտը չի գերազանցում 29 հազար 934 դրամը։ Ծայրահեղ աղքատների թիվը ևս նվազել է՝ կազմելով 1,2 %՝ 2021 թվականի 1,5 %-ի փոխարեն։

Ինֆոգրաֆիկա

Ներկայացված գծապատկերում կարող ենք տեսնել, որ թեև միջին աղքատների թիվը նվազել է, այնուամենայնիվ, աղքատության ստորին շեմն անցած բնակիչների թիվն ավելացել է՝ 2021 թվականի 10,5 %-ի փոխարեն դառնալով 11,6 %: Ընդ որում՝ աղքատ է կանանց 24,7 %-ը, տղամարդկանց՝ 25 %-ը։

Աղքատությունն՝ ըստ մարզերի

Աղքատ բնակչության մեծ մասը՝ 22,5 %-ը ապրում է Երևանում, 15,6 %-ն Արմավիրի մարզում, իսկ 13,8 %-ը՝ Շիրակի մարզում։ Աղքատ բնակչության ամենափոքր մասը՝ 0,9 %-ը Սյունիքի մարզում է։

Գծապատկերում ներկայացրել ենք, թե Հայաստանի յուրաքանչյուր մարզում ապրող բնակչության քանի տոկոսն է աղքատ։ Աղքատության մակարդակով առաջինը Շիրակի մարզն է, ամենաբարվոք վիճակը դարձյալ Սյունիքի մարզում է։

Աղքատությունն՝ ըստ կրթության

Ըստ Վիճակագրական կոմիտեի տվյալների՝ բարձրագույն կրթություն ունեցողների շուրջ 15 %-ը աղքատ է։ Այնուամենայնիվ, աղքատների մեծ մասը տարրական և ցածր կրթություն ունեցող անձինք են։

Բնակարանային պայմանները՝ աղքատ բնակչության շրջանում

Բնակարանային պայմանները համեմատաբար ավելի վատ են աղքատ և հատկապես ծայրահեղ աղքատ ընտանիքներում: Եթե բնակարանի մակերեսի սակավությունից դժգոհել է հարցմանը մասնակից ոչ աղքատ տնային տնտեսությունների 16.2%-ը, ապա աղքատների շրջանում բնակմակերեսի չափից դժգոհել է 25.9%-ը, ծայրահեղ աղքատների 57.3%-ը: Նույն կերպ ծայրահեղ աղքատների համար խնդիր է հանդիսացել ջեռուցման պակասը, քանդված պատեր և հատակ ունենալը, քանդված փեղկեր և դռներ ունենալը, ինչպես նաև՝ խոնավությունը, վերելակի խափանումը, կաթող տանիքը, վատ լուսավորվածությունը:

Անժելա Պողոսյան