Քաղաքականություն
13.11.2023 | 12:34
Հայաստանի ու Ֆրանսիայի ռազմական համագործակցությունը շարունակում է հարուցել Բաքվի դժգոհությունը։ Ադրբեջանի ԱԳՆ-ն հայտարարություն է տարածել ու դատապարտել Ֆրանսիայի կողմից Հայաստանին Bastion բազմաֆունկցիոնալ զրահամեքենայի և սարքավորումների մատակարարման կապակցությամբ։
Հավելենք, որ նախօրեին ադրբեջանական լրատվամիջոցները լուսանկարներ էին տարածում՝ պնումով, որ վրացական Փոթի նավահանգիստ է ժամանել Ֆրանսիայից Bastion զրահատեխնիկայի խմբաքանակը, որը շարժվում է Հայաստան։ Այս մասին պաշտոնական որևէ հաստատում չկա։
«Մենք խստորեն դատապարտում ենք Ֆրանսիայի կողմից «Բաստիոն» հարձակողական զրահատեխնիկայի ուղարկումը Հայաստան։ Ֆրանսիայի այս քայլերը, որն իրեն դրսևորում է որպես միջազգային իրավունքի, տարածաշրջանում խաղաղության և կայունության կողմնակից, լրջորեն կասկածի տակ են դնում Բաքվի և Երևանի միջև հարաբերությունների կարգավորմանն ուղղված ջանքերը՝ հիմնված ինքնիշխանության, տարածքային ամբողջականության և միջազգային սահմանների փոխադարձ ճանաչման և հարգանքի վրա և նպաստում են իրավիճակի սրմանը»,- ասել է Ադրբեջանի ԱԳՆ խոսնակ Այխան Հաջիզադեն։
Նա նշել է, թե Հայաստանին ռազմական տեխնիկայի փոխանցումը ծառայում է «Հայաստանի ռազմական ներուժի և ապակառուցողական գործունեության ուժեղացմանը»։
«Ֆրանսիայի կողմից Ադրբեջանի դեմ սկսված զրպարտչական արշավի և տարածաշրջանում նրա ապակառուցողական գործողությունների ֆոնին Հայաստանի ռազմականացման քաղաքականությանը ծառայող այս քայլերը ցույց են տալիս, որ Փարիզը գործում է տարածաշրջանում կեղծ շահերից ելնելով»,- ասել է Հաջիզադեն։
Ադրբեջանը, որը Թուրքիայից ու Իսրայելից պարբերաբար ստանում է ժամանակակից սպառազինություն ու զինամթերք և իրականացրել է ԼՂ-ի հայերի դեմ ռազմական ագրեսիա ու էթնիկ զտում, միջազգային հանրությանը կոչ է անում «զերծ մնալ Հայաստանին զինելուց և դատապարտել տարածաշրջանում խաղաղության և բարգավաճման հաստատմանը խոչընդոտող գործողությունները»։
«Հայաստանը և Ֆրանսիան պետք է վերջ դնեն տարածաշրջանում սպառազինության և ռազմականացման քաղաքականությանը, և այդ երկրները պետք է վերջապես հասկանան, որ տարածաշրջանում խաղաղությունն ու համագործակցությունն այլընտրանք չկա», – ասել է Հաջիզադեն։
Էմմա Չոբանյան
