Պատերազմը տեղափոխվում է «դիրքային» և «ձգձգվող» նոր փուլ․ Ուկրաինայի ԶՈՒ ղեկավար

Ռուսաստանի և Ուկրաինայի միջև ռազմական հակամարտությունը տեղափոխվում է դիրքային պատերազմի նոր փուլ՝ ստատիկ և երկարատև մարտերով՝ ի տարբերություն մանևրային պատերազմի, որը ենթադրում է շարժում և արագություն։ Այս մասին բրիտանական The Economist-ի համար հոդվածում գրել է Ուկրաինայի Զինված ուժերի գլխավոր հրամանատար, գեներալ Վալերի Զալուժնին, փոխանցում է DW-ի ռուսական ծառայությունը։

«Դա ձեռնտու կլինի Ռուսաստանին և նրան թույլ կտա վերականգնել իր ռազմական հզորությունը՝ ի վերջո սպառնալով Ուկրաինայի զինված ուժերին և հենց պետությանը»,- գրել է նա։

Զալուժնիի կարծիքով՝ ագրեսորի կողմից պարտադրված իրավիճակից դուրս գալու համար Ուկրաինան պետք է լուծի հինգ հիմնական խնդիր՝ հասնել օդային գերակայության, ուժեղացնել ռադիոտեղորոշիչ պատերազմի հնարավորությունները, ավելացնել հրետանային հարվածների քանակը, ականազերծման նոր տեխնոլոգիաներ ներդնել և ընդլայնել Ուկրաինայի քաղաքացիների կատեգորիաները, որոնք կարող են կանչվել մոբիլիզացման և ուսուցման։ Ըստ նրա՝ ժամկետային զինծառայողների անբավարար քանակի պատճառով առայժմ հնարավոր չէ արձակուրդ տրամադրել ռազմաճակատում գտնվող զինվորներին։

Ուկրաինացի գեներալը, միաժամանակ, նշել է, որ Ռուսաստանին չի կարելի թերագնահատել։

«Այն մեծ կորուստներ է կրել և սպառել է մեծ քանակությամբ զինամթերք: Բայց դեռ երկար ժամանակ գերազանցություն կունենա զենքի, տեխնիկայի, հրթիռների և զինամթերքի առումով: Նրա պաշտպանական արդյունաբերությունը մեծացնում է արտադրության ծավալները՝ չնայած աննախադեպ պատժամիջոցներին»,- նշվում է հոդվածում:

Ըստ Զալուժնիի՝ ՆԱՏՕ-ի Ուկրաինայի գործընկերները նույնպես կտրուկ մեծացնում են իրենց արտադրական հզորությունները, սակայն նկատելի արդյունքներ տեսնելու համար կպահանջվի առնվազն մեկ տարի, իսկ որոշ դեպքերում՝ ինքնաթիռների և կառավարման համակարգերի պարագայում, երկու անգամ ավելի երկար:

Դիրքային պատերազմի թակարդից խուսափելու համար Ուկրաինան պետք է կենտրոնանա ժամանակակից կառավարման վրա՝ մարտադաշտի ավելի լավ պատկերացման և որոշումների ավելի արագ կայացման համար՝ միաժամանակ խաթարելով ռուսական նյութատեխնիկական ապահովումը հեռահար հրթիռներով, նշել է Զալուժնին՝ հավելելով, որ ինովացիոն մոտեցումները կարող են դիրքային պատերազմը վերածել մանևրային պատերազմի։

Էմմա Չոբանյան