Քաղաքականություն
21.09.2023 | 14:19
Լեռնային Ղարաբաղում «հրադադարը, անկասկած դրական է, եթե այն երկար պահպանվի, քանի որ զանգվածային արյունահեղության վտանգը կկանխվի»։ Այս մասին Guardian-ին ասել է Քարնեգի Եվրոպական կենտրոնի փորձագետ Թոմաս դե Վաալը։
«Այն, ինչ մենք տեսնում ենք այստեղ, Ռուսաստանի միջամտությունն է Ադրբեջանի անունից՝ գոնե առայժմ իր խաղաղապահ ուժերը Ղարաբաղում և դրանով իսկ հենակետը Հարավային Կովկասում պահելու համար։ Հիմնական պարտվողները Ղարաբաղի հայերն են, ովքեր կորցրել են իրենց 35-ամյա պայքարը ինքնորոշման կամ Ադրբեջանից անջատվելու համար։ Նրանք հիմա կորցնում են ինքնապաշտպանության ցանկացած միջոց և Ադրբեջանում կանգնած են շատ անորոշ ապագայի առաջ: Ղարաբաղցիները կարող են խուսափել լիակատար ոչնչացումից, բայց ավելի հավանական է, որ նրանք բախվում են իրենց հայրենիքից դանդաղ հեռացման հետ, քանի որ Ադրբեջանը նրանց չի առաջարկում որևէ ինքնավարություն կամ հատուկ քաղաքական իրավունքներ»,- նշել է նա:
Մյուս պարտվածները, դե Վաալի խոսքով, Եվրամիությունն ու Միացյալ Նահանգներն են, որոնք ջանք չեն խնայել այս հակամարտությունում միջնորդ հանդիսանալու համար, բայց որոնց իրավունքների և միջազգային երաշխիքների ուղերձը խեղդվում է Ադրբեջանի և Ռուսաստանի ավելի կոշտ ուղերձներով:
