Քաղաքականություն
18.08.2023 | 22:02Ո՞րն է լինելու Հայաստանի հաջորդ քայլը։ ՄԱԿ-ի Անվտանգության խորհրդի անդամ 15 երկրների ներկայացուցիչների գերակշռող մեծամասնությունը համակարծիք էր, որ մարդասիրական խնդիրները չեն կարող օգտագործվել որպես մահակ 120 հազար մարդու իրավունքները ճնշելու համար:
Դիվանագետների մեծ մասը հստակ ընդգծում էր` Լաչինի միջանցքը պետք է բացվի, մյուսները հնարավոր էին համարում նաև այլ երթուղիների գործարկումը։ Օրինակ՝ ԱՄՆ-ը հորդորեց Ադրբեջանի կառավարությանը՝ վերականգնել ազատ տեղաշարժը Լաչինի միջանցքով, և վերջակետ, որպեսզի մարդասիրական ու քաղաքացիական մեքենաները հասնեն Լեռնային Ղարաբաղ։
«Մենք նաև նշում ենք մարդասիրական մատակարարումների համար հավելյալ երթուղիների հարցում փոխզիջման հասնելու հնարավորությունը»,- հայտարարեց նիստը նախագահող Միացյալ Նահանգների դեսպանը:
ԵՄ ներկայացուցիչն ասաց, որ Աղդամի ճանապարհը չպետք է դիտարկվի Լաչինի միջանցքը բացելուն այլընտրանք։ Իսկ ահա ՌԴ-ն հայտարարեց, թե հուլիսի 25-ին Ադրբեջանի և Հայաստանի ԱԳ նախարարներին ՌԴ-ն ներկայացրել է իրատեսական, փոխզիջումային լուծումներ՝ լարվածությունը թոթափելու համար:
«Խոսքն Աղդամով և Լաչինով միջանցքները միաժամանակ բացելու մասին է` քաղաքացիական անձանց և ոչ ռազմական բեռների տեղափոխման համար»,- ասաց ՌԴ ներկայացուցիչը:
ՌԴ-ն կոչ արեց նաև պատասխանատու վերաբերմունք դրսևորել ՄԱԿ-ի ԱԽ հարթակի կիրառման ուղղությամբ Բաքվի և Երևանի միջև՝ դրսից չպետք է պարտադրվեն լուծումներ և ծրագրեր, երկխոսությունը չպետք է դրանով փոխարինել։
Ի՞նչ էր սա, Արևմուտքի ուղղությամբ կշտամբա՞նք։ Հայտնի դարձավ նաև Ռուսաստանի ծրագիրը՝ Ադրբեջանի կազմում Արցախի հետագա գոյություն ենթադրող՝ ադրբեջանական օրենսդրության պաշտպանությամբ։
Ի՞նչ արդյունքներ գրանցվեցին ՄԱԿ-ի Անվտանգության խորհրդում։ Ի՞նչ է պետք անել։ Factor TV-ի տաղավարում հրավիրված քննարկմանը մասնակցում են ԱԺԲ խորհրդի անդամ, դիվանագետ Արա Պապյանը, «Ազատ Հայաստան» նախաձեռնության հիմնադիր Էդգար Առաքելյանը, քաղաքագետ Ռոբերտ Ղեվոնդյանը, «Մենք Արցախն ենք» նախաձեռնող խմբի անդամ Լիաննա Պետրոսյանը։
Մանրամասները՝ տեսանյութում։
