14.01.2025 | 14:09
Արարատ Միրզոյանը ՌԴ է հրավիրվել․ նախարարն ընդունել է հրավերը․ Լավրով
ԵՄ-ն ողջունում է Հայաստան-Ադրբեջան բանակցությունների աշխուժացումն ու կոչ անում խուսափել խաղաղ գործընթացը վտանգի տակ դնող քայլերից
Քաղաքականություն
30.05.2023 | 15:25
ԵՄ Արտաքին գործերի և անվտանգության քաղաքականության գլխավոր խոսնակ Պետեր Ստանոն հայտարարություն է տարածել Հայաստան-Ադրբեջան բանակցությունների վերաբերյալ։
Նշվում է, որ Հայաստան-Ադրբեջան հարաբերությունների կարգավորման գործընթացը վերջին մեկ ամսվա ընթացքում աշխուժացել է, ինչը Եվրամիությունը ողջունում է։ ԵՄ-ն կարծում է, որ կարևոր է «պահպանել այս պատմական թափը» և խուսափել քայլերից, ներառյալ՝ թշնամական հռետորաբանությունը, որոնք կարող են վտանգի տակ դնել խաղաղության գործընթացը:
Մայիսի սկզբին ԱՄՆ-ում կայացած խաղաղության պայմանագրի շուրջ բանակցություններից հետո, մայիսի 14-ին Բրյուսելում տեղի է ունեցել առաջնորդների հանդիպումը՝ հունիսի 1-ին Մոլդովայի Հանրապետության Քիշնև քաղաքում նախատեսված մեկ այլ հանդիպումից առաջ։ Հայաստանի և Ադրբեջանի ղեկավարները հանդիպել են նաև Մոսկվայում։
«Բրյուսելում նրանք կենտրոնացել են մի քանի առանցքային թեմաների վրա, ինչպիսիք են սահմանային խնդիրները, մարդասիրական խնդիրները և նախկին Լեռնային Ղարաբաղի Ինքնավար Մարզի տարածքում ապրող հայերի իրավունքներն ու անվտանգությունը: Այդ ժամանակից ի վեր ղեկավարները հրապարակավ վերահաստատել են իրենց աներկբա հավատարմությունը 1991 թ. Ալմաթայի հռչակագրին և Հայաստանի (29,800 քառ․կմ) և Ադրբեջանի (86,600 քառ կմ) համապատասխան տարածքային ամբողջականությանը: Մենք ողջունում ենք մայիսի 22-ին այս կապակցությամբ ՀՀ վարչապետ Նիկոլ Փաշինյանի համարձակ հայտարարությունը և երկկողմ սահմանի սահմանազատման ուղղությամբ աշխատելու Հայաստանի հստակ պատրաստակամությունը։ Մենք ողջունում ենք նաև Ադրբեջանի նախագահ Իլհամ Ալիևի՝ մայիսի 25-ի հայտարարությունը»,-ասվում է հայտարարության մեջ։
Նշվում է, որ քանի որ զգայուն հարցերի շուրջ աշխատանքը շարունակվում է, կարևոր է քայլեր ձեռնարկել վստահություն ձևավորելու, ներգրավվելու և առաջնորդություն ցուցաբերելու համար՝ համապարփակ կարգավորմանը վերաբերող բոլոր հարցերի լուծումներին հասնելու համար:
Ըստ ԵՄ-ի՝ չնայած հակամարտությունների բարդ պատմությանը՝ բոլոր հարցերը պետք է լուծվեն բացառապես խաղաղ ճանապարհով, երկխոսության միջոցով, որին էլ հանձնառու են աջակցել։
Ի դեպ, ԵՄ հայտարարության մեջ չի ասվում՝ ինչպիսին է վերաբերունքը Ադրբեջանի նախագահ Իլհամ Ալիևի վերջին հայտարարությունների առնչությամբ, երբ նա սպառնում էր Հայաստանին ու Արցախին նոր ռազմական գործողություններով ու էթնիկ զտմամբ։
Էմմա Չոբանյան
