06.06.2026 | 15:15
Մոտ 100 ընտրողի տրվել է 100 հազարից մինչև 500 հազար դրամ ընտրակաշառք․ 40 անձ ձերբակալվել է
Դունյա Միյատովիչը հայտնել է, որ չնայած Ղարաբաղ այցելելու՝ Ադրբեջանի իշխանություններին ուղղված դիմումներին՝ դրան չի հաջողվել հասնել
Քաղաքականություն
17.05.2023 | 14:27
Եվրոպայի խորհրդի մարդու իրավունքների հանձնակատար Դունյա Միյատովիչը «Ամերիկայի Ձայն»-ի ադրբեջանական ծառայությանը տված հարցազրույցում մտահոգություն է հայտնել Ադրբեջանում մարդու իրավունքների իրավիճակի վերաբերյալ։ Նա անընդունելի է համարել լրագրողների, իրավապաշտպանների և քաղաքացիական հասարակության ներկայացուցիչների նկատմամբ շարունակվող ճնշումներն ու հետապնդումները։
«Ես շարունակում եմ հետևել Ադրբեջանում մարդու իրավունքների իրավիճակին և բարձրաձայնել խնդիրների մասին, հիմնականում՝ իրավապաշտպանների և լրագրողների կալանավորման հետ կապված։ Ներկայում ես ուշադիր հետևում եմ Բախտիյար Հաջիևի գործին։ Նրա հացադուլն ու առողջական վիճակի վատթարացումը մտահոգիչ են։ Ես իմացա, որ նրա կալանքը վերջերս երկարացվել է ևս երկու ամսով, և չեմ կարող հասկանալ, թե ինչու։ Նրան նման տառապանք պատճառելու համար ոչ մի արդարացում չկա։ Միաժամանակ, բարձրացրել եմ Էլչին Սադիգովի և Ավազ Զեյնալիի հարցը։ Բայց ոչ միայն իմ թվարկած մարդիկ, շատ այլ մարդիկ թիրախ են դառնում իրենց աշխատանքի կամ որոշակի հարցերի վերաբերյալ տարբեր հայացքների պատճառով»,- ասել է Միյատովիչը՝ հավելելով, որ դա անընդունելի է, և բազմաթիվ անգամներ իր մտահոգությունները բացահայտ արտահայտել է Ադրբեջանի կառավարությանը։
Նա նաև նշել է, որ ուշադրությամբ հետևում է 2020 թվականի նոյեմբերի եռակողմ հայտարարությանը՝ Հայաստանի, ՌԴ-ի ու Ադրբեջանի ղեկավարների կողմից ստորագրված։
«Այդ ժամանակ ես անմիջապես կապ հաստատեցի և՛ Ադրբեջանի, և՛ Հայաստանի հետ՝ տեսնելու, թե ինչպես կարող եմ ծառայել՝ որպես հանձնակատար: Իհարկե, մարդու իրավունքների հարցերում, քանի որ ես քաղաքական գործիչ չեմ։ Ուզում եմ հանդիպել ու շփվել մարդկանց հետ։ Ուզում եմ այցելել խոցելի խմբերին, տարեցներին, երեխաներին, կանանց, հարցնել նրանց խնդիրների մասին։ Դրանից հետո շատ եմ աշխատում Ղարաբաղ այցելելու ուղղությամբ։ Ես առաջարկել եմ Ադրբեջանի իշխանություններին նույնիսկ միասին այցելել։ Գիտեմ, որ քաղաքական տեսակետից զգայուն հարց է, ես ճանաչում եմ Ադրբեջանի ինքնիշխանությունը։ Չնայած դրան՝ իմ այցը դեռ չի հաջողվել»,- ասել է Միյատովիչը։
Նա հավելել է, որ հուշագիր է հրապարակել՝ կապված մարդու իրավունքների հարցերի հետ, որոնք առավել զգայուն են հասարակության համար հետկոնֆլիկտային միջավայրում:
«Դիմելով երկու կողմերին՝ ես ասացի, որ կարող եմ օմբուդսմենների հետ համատեղ աշխատել որոշակի հարցերի շուրջ, որոնք կարող են կարևոր դեր խաղալ երկու հասարակությունների համար»,- ասել է եվրոպացի պաշտոնյան։
Միյատովիչը եզրափակել է, որ վերջին տարիներին Ադրբեջանում խոսքի ազատության և լրատվամիջոցների վիճակի հարցում որևէ դրական փոփոխություն չի եղել։
Էմմա Չոբանյան
