Պայմանագրի ստորագրում հնարավոր է ՀՀ տարածքից ադրբեջանական զորքի դուրսբերման պայմաններում․ Գրիգորյան․ ՏԵՍԱՆՅՈՒԹ

«Բանակցություններում հայտնի սկզբունք կա՝ քանի դեռ ամեն ինչ համաձայնեցված չէ, ոչ մի բան էլ դեռ համաձայնեցված չէ։ Այս բանակցություններին այդ տեսանկյունից պետք է մոտենալ»,- այսօր լրագրողների հետ զրույցում այս մասին նշեց ԱԽ քարտուղար Արմեն Գրիգորյանը՝ մեկնաբանելով նախարարների համատեղ հայտարարությունը, թե առանցքային հարցերի շուրջ կողմերի դիրքորոշումները շարունակում են մնալ տարամետ, և հարցին՝ կա՞ն կոնկրետ հարցեր, որոնց շուրջ համաձայնություն կա։

Գրիգորյանի խոսքով՝ որոշ հարցերում եղել է առաջընթաց, բայց դրանք ամենահիմնարարը չեն։

ՀՀ ԱԽ քարտուղարը հավելեց, որ միջազգային երաշխավորների ինստիտուտի հարցով բանակցությունները շարունակվում են․ «Հայաստանի և Ադրբեջանի ղեկավարները կիրակի հանդիպելու են Բրյուսելում, այնուհետև այդ հանդիպումը շարունակվելու է Քիշինևում։ Սպասվող բանակցություններին միանալու են նախագահ Մակրոնն ու վարչապետ Շոլցը։

Կփորձենք աշխատել այն ուղղությամբ, որ հնարավորինս մոտարկենք մոտեցումները։ Այս պահին վերջնական լուծում չկա, եթե լուծում գտնենք, առաջ կշարժվենք»։

Անդրադառնալով հարցին, թե որ քաղաքական վեկտորի հովանու ներքո և որտեղ տեղի կունենա խաղաղության պայմանագրի վերջնական կնքումը, Գրիգորյանը նշեց․ «Դա որոշված չէ, որտեղ հնարավոր եղավ առաջընթաց գրանցելու և վերջնական համաձայնության հասնելու, այնտեղ էլ կստորագրենք»։

ԱԽ քարտուղարի խոսքով՝ կարևոր չէ, թե ինչ վերնագիր կունենա փաստաթուղթը. «Կարևորը բովանդակությունն է։ Մի քանի կարևոր հարց կա, եթե այդ հարցերի շուրջ կարողանում ենք լուծումներ գտնել, կարևորը դա է»։

«Պայմանագրի ստորագրում հնարավոր է ՀՀ տարածքից ադրբեջանական զորքի դուրսբերման պայմաններում․ դա պարտադիր է»,- ընդգծեց Գրիգորյանը։

Մանրամասները՝ տեսանյութում։