19.02.2026 | 16:48
Հայաստան կժամանի ԵՄ ներքին գործերի և միգրացիայի հարցերով հանձնակատարը
ՀՀ-ի ինչի՞ն է պետք Ռուսաստանը, եթե պատրաստ չէ գոնե ապահովել Արցախի հայերի անվտանգությունը․ Տիգրան Գրիգորյան․ ՏԵՍԱՆՅՈՒԹ
Քաղաքականություն
25.04.2023 | 17:20
Այժմ առկա է հիմնարար մի հարց՝ արդյո՞ք Ռուսաստանի Դաշնությունը պատրաստ է կատարել 2020թ․ նոյեմբերի 9-ի հայտարարությամբ ստանձնած պարտավորությունները։ «Ադրբեջանական անցակետ Լաչինի միջանցքում․ էթնիկ զտման քաղաքականության նոր քայլերը» թեմայով քննարկման ժամանակ այս մասին նշեց «Ժողովրդավարության եւ անվտանգության տարածաշրջանային կենտրոն»-ի տնօրեն, քաղաքագետ Տիգրան Գրիգորյանը։
Քաղաքագետի խոսքով՝ ռուս խաղաղապահները կանգնած են Հակարիի կամրջի մոտ, այնտեղ ունեն հենակետ, սակայն ադրբեջանական կողմի ներկայացուցիչներն այնտեղ պարզապես զբոսնում են։
«Այս իրավիճակը կարող է դառնալ Հարավային Կովկասում ռուս խաղաղապահների անվտանգային ճարտարապետության և այստեղ ռուսական ներկայության ավարտի սկիզբը։ Կասկածի տակ կդրվի հարավային Կովկասում ռուսական անվտանգային ճարտարապետությունը, որը ստեղծվել է 2020 թվականի պատերազմից հետո։ Եթե Մոսկվան պատրաստ չէ ապահովել առնվազն արցախցիների անվտանգ կյանքը և հայերի ներկայությունը Լեռնային Ղարաբաղում, ապա հարց է առաջանում, թե ընդհանրապես Հայաստանի ինչի՞ն է պետք Ռուսաստանը»,- ընդգծեց քաղաքագետը։
Նշենք, որ ապրիլի 23-ին Ադրբեջանը փակել է Հայաստանը Կոռնիձոր գյուղից Արցախին կապող նոր մայրուղու Հակարի գետի կամուրջը, որը, շրջափակմամբ պայմանավորված, շահագործվում էր ռուս խաղաղապահների և ԿԽՄԿ առաքելության կողմից՝ մարդասիրական նպատակներով։ Ադրբեջանը հայտարարել է, որ Հայաստանն Արցախին կապող ճանապարհը փակել են հսկիչ անցակետ տեղադրելու նպատակով։
Ադրբեջանը Հակարիի կամրջի մոտ շինարարական աշխատանքներ է սկսել ու տեղեկատվական ցուցանակ տեղադրել, թե այն Ադրբեջանի տարածք է։
Մանրամասները՝ տեսանյութում։
