07.10.2026 | 15:10
ՀՀ-ում հրթիռների արտադրության հարցի քննարկում Դելիի հետ՝ ըստ ԶԼՄ-ի // Երևանում փակ փողոցներ կլինեն․ ԼՈՒՐԵՐ
Աշխատանքային միջավայրում 42.7 տոկոսն առնչվել է սեռական ոտնձգությանը. «Կանանց ռեսուրսային կենտրոնը» ներկայացրել է հետազոտությունների արդյունքները
Հասարակություն
03.04.2023 | 22:37
«Սոլիդարիթի Սենթեր» հայաստանյան մասնաճյուղը և «Կանանց ռեսուրսային կենտրոն» ՀԿ-ն այսօր կազմակերպել էին հանդիպում-քննարկում «Աշխատավայրում սեռական ոտնձգության հիմնախնդիրը Հայաստանում» հետազոտության արդյունքների վերաբերյալ: Հետազոտությունն իրականացրել էր «Կանանց ռեսուրսային կենտրոնը»։ Հետազոտությանը մասնակցել է 590 հոգի, մեծամասնությունը՝ երիտասարդ կանայք։ Հետազոտության արդյունքում պարզ է դարձել, որ աշխատանքային միջավայրում 42.7 տոկոսն առնչվել է սեռական ոտնձգությունների։
«Կանանց ռեսուրսային կենտրոն»-ի հետազոտող Սոնա Բալդրյանը Factor.am-ին հայտնեց, որ սեռական ոտնձգությունը տարածված է առաջին հերթին սպասարկման ոլորտում։ Ըստ նրա՝ դա նաև պայմանավորված է ոլորտում չգրանցված աշխատակիցների մեծ թվով, ինչն իր հերթին դժվարացնում է վերահսկողությունը։
Խնդիր է նաև հասարակական ընկալումը․ Բալդրյանը ցավալի է համարում այն, որ երբեմն ոտնձգության ենթարկված անձին են մեղադրում տեղի ունեցածի համար։
Հետազոտության արդյունքները փաստում են, որ կան նաև բացեր Աշխատանքային օրենսգրքում։ Օրենսգիրքը չի սահմանում աշխատանքում սեռական ոտնձգություն հասկացությունը։
Հանդիպմանը ներկա էին նաև օրենսդիր և գործադիր մարմինների ներկայացուցիչներ։ Ազգային ժողովի Առողջապահության և սոցիալական հարցերի մշտական հանձնաժողովի նախագահ Հերիքնազ Տիգրանյանը իր ելույթում ասաց, որ այս հետազոտությունը շատ կարևոր էր և ճիշտ ժամանակին կատարված։
«Ազգային ժողովում առաջին ընթերցմամբ ընդունվել է Աշխատանքային օրենսգրքի փոփոխությունների նախագիծը և մենք փորձում ենք օրենսդրական դաշտը կարգավորել»,- ասաց պատգամավորը։
Նշենք որ քննարկմանը ներկա էին նաև հասարակական կազմակերպությունների ներկայացուցիչներ, որոնք ներկայացրեցին և հանդես եկան մի շարք առաջարկներով աշխատավայրերում սեռական ոտնձգության խնդրի լուծման ուղղությամբ։
Սոնա Հովսեփյան
