ԱԳՆ-ն՝ Լաչինի միջանցքում տեխնիկական ստուգման հավելյալ միջոցներ ներդնելու՝ Լավրովի հայտարարության մասին

Լաչինի միջանցքի հետ կապված հարցերը կարգավորվում են 2020 թվականի նոյեմբերի 9-ի եռակողմ հայտարարության դրույթներով։ Արձագանքելով Factor.am-ի հարցմանը՝ հայտնում են Հայաստանի արտաքին գործերի նախարարությունից։ Գրավոր հարցմամբ արտաքին քաղաքական գերատեսչությանը խնդրել էինք արձագանքել Ռուսաստանի արտաքին գործերի նախարար Սերգեյ Լավրովի՝ փետրվարի 28-ին Բաքվում արած հայտարարությանը։ Ադրբեջանի արտգործնախարար Բայրամովի հետ հանդիպմանը Լավրովը, խոսելով Լաչինի միջանցքից, ասել էր, որ թեև եռակողմ հայտարարությամբ Լաչինի միջանցքում անցակետի տեղադրում չի նախատեսվում, բայց չի բացառվում Հայաստանը Լեռնային Ղարաբաղին կապող ճանապարհի վրա տեխնիկական ստուգման հավելյալ միջոցների ներդրումը։

ԱԳՆ-ից խնդրել էինք հայտնել, թե ինչ տեխնիկական միջոցների մասին է խոսում Լավրովը և հնարավո՞ր է՝ Բաքուն և Մոսկվան, առանց հայկական կողմի համաձայնության, Լաչինի միջանցքում տեխնիկական միջոցներ ներդնելու պայմանավորվածություն ձեռք բերեն։

Այս հարցերին ի պատասխան արտաքին գործերի նախարարությունից հերթական անգամ հղում են արել նոյեմբերի 9-ի եռակողմ հայտարարությանը։ «Լաչինի միջանցքի հետ կապված հարցերը կարգավորվում են 2020 թվականի նոյեմբերի 9-ի եռակողմ հայտարարության դրույթներով, այն է՝ Լաչինի միջանցքը պետք է լինի ռուս խաղաղապահների վերահսկողության ներքո, և Ադրբեջանը երաշխավորում է Լաչինի միջանցքով քաղաքացիների , տրանսպորտային միջոցների և բեռների՝ երկու ուղղություններով տեղաշարժի անվտանգությունը»,- ասվում է ԱԳՆ-ի գրավոր պատասխանում։

Արտաքին քաղաքական գերատեսչությունից այդպես էլ չեն հստակեցրել՝ Հայաստանի ԱԳՆ-ն այս հարցով որևէ քննարկման ներգրավված է, թե ոչ։ Ստեփանակերտից հայտարարում են, թե դեմ չեն ռենտգեն սարքերի տեղադրմանը, եթե այն լինի ռուս խաղաղապահների վերահսկողության ներքո։

Ի դեպ, վերջերս էլ Լաչինիչ միջանցքում ռենտգեն սարքերի տեղադրման շուրջ զրույցների ֆոնին ուշագրավ հայտարարություն էր արել նաև Հարավային Կովկասի և Վրաստանում ճգնաժամի հարցերով ԵՄ հատուկ ներկայացուցիչ Տոյվո Կլաարը։ Նա ասել էր, թե «Լաչինի միջանցքով անցնող բեռների թափանցիկության ապահովման գաղափարն իրավաչափ է, և չեն ցանկանում, որ ճանապարհն օգտագործվի լարվածությունը մեծացնող բեռների տեղափոխման համար և որևէ ռազմական կամ անօրինական նպատակներով»։

Շողիկ Գալստյան