Քաղաքականություն
20.02.2023 | 20:02ՌԴ բարձրաստիճան պաշտոնյաներ Լավրովի և Վոլոդինի՝ ՀՀ-ին ուղղված ագրեսիվ հայտարարություններից հետո, թե կարող է երկիր կորցնեք՝ ԵԽԽՎ-ին և Եվրախորհրդարանին նայելով, թե ՀՀ-ն «օկուպացրել» էր Ադրբեջանի տարածքները, այդ պատճառով ՀԱՊԿ-ն չի գնահատել Ադրբեջանի հարձակումը, հիմա էլ «Գազպրոմ-Արմենիա» ընկերությունը հայտնեց, թե Ստավրոպոլում մասնակի խցափակվել է ՀՀ-ին սնուցող գազատարը։ Ըստ այդմ՝ զգալիորեն նվազել են ՀՀ ներկրվող բնական գազի օրական ծավալները․ ԱԳԼՃԿ-ներինը վերականգնվեց պահեստների հաշվին։
Գուցե սա իսկապես տեխնիկական խնդիր է, բայց գիտենք՝ ՌԴ-ն գազային մահակով է շփվում այլ երկրների հետ։ Հավանակա՞ն է, որ առաջիկայում էլ Լարսի անցկակետը փակվի կամ պարզվի, որ հայկական ապրանքները ռուսական շուկայի ստանդարներին չեն համապատասխանում, և այդպես շարունակ։ Ի՞նչ միտում կա։
«Հանրապետություն» կուսակցության ղեկավար Արամ Սարգսյանը Factor TV-ին տված հարցազրույցում առաջարկում է այս խնդրին ավելի լայն պատկերից նայել։
«Մենք պետք է անենք հետևյալ հետևությունը, որ Հայաստանը մերժեց ՀԱՊԿ դիտորդական խմբին, քանի որ այդ դաշինքը ՀՀ սահմանները չի ճանաչում, և նախընտրեց ԵՄ-ի դիտորդական խումբը, որը 1991-ի սահմաններով ՀՀ-ն է ճանաչում։ Նախկին խումբը ցույց տվեց, որ արդյունավետ են գործում, հուսանք՝ այս խմբի աշխատանքն էլ արդյունավետ կլինի։ ՀՀ իշխանությունները շատ գոհ են այս արդյունքից, ԵՄ-ն շատ գոհ է, որ ՀՀ-ին ընդառաջել է և 100 հոգանոց դիտորդական խումբ է ուղարկել, սրանով հայտնվել ենք մի վիճակում, երբ երկու կողմն էլ բավարարված են, և ոչ մի այլ փոփոխություն տեղի չի ունենում»,- ասաց Արամ Սարգսյանը։
Նա պնդում է, որ ՀՀ-ի անելիքը ոչ թե ՌԴ-ի սպառնալիքներին հակադարձելը պիտի լինի, այլ պետք է կատարել հաջորդ քայլը։ «Հանրապետություն» կուսակցության ղեկավարը պահանջ ներկայացրեց վարչապետ Նիկոլ Փաշինյանին՝ հայտարարել եվրոպական ինտեգրման մտադրության մասին և քայլեր ձեռնարկել այդ ուղղությամբ՝ դուրս գալով ՀԱՊԿ-ից, ԵՏՄ-ից։
Հարցազրույցն ամբողջությամբ՝ տեսանյութում։
Ռոբերտ Անանյան
