ՀԱՊԿ-ն անհապաղ ո՞ւր տեղակայվի, եթե չգիտի ՀՀ-Ադրբեջան սահմանը որտեղ է, օկուպացիայի փաստը չի ընդունել․ Սոնա Ղազարյանը՝ ՌԴ ԱԳՆ-ին․ ՏԵՍԱՆՅՈՒԹ

Օրերս ԵԽԽՎ-ում տեղի ունեցավ քննարկում հայկական պատվիրակության դիմումով՝ Լաչինի միջանցքի փակման հարցով։ Այդ թվում՝ եվրոպացի պատգամավորները սուր գնահատեցին Ադրբեջանի քայլերը, նշելով, որ հումանիտար ճգնաժամ է, տագնապալի է միջանցքում դրությունը, պետք է բացել։ Ռուբեն Ռուբինյանն առաջարկեց փաստահավաք խումբ ուղարկել Լաչին։ Բայց ո՛չ որոշում կայացվեց ԵԽԽՎ-ում, ո՛չ փաստաթուղթ ընդունվեց։

Factor TV-ի հետ հարցազրույցում ԱԺ «Քաղաքացիական պայմանագիր» խմբակցության պատգամավոր Սոնա Ղազարյանին հարց ուղղեցինք՝ կարելի՞ է նշել, որ ոչ մի արդյունք չտվեց ԵԽԽՎ-ի նիստը՝ լոկ խոսքեր հնչեցին, որոնք ոչ մի ազդեցություն չեն ունենա Ալիևի վրա։ ՀՀ կառավարող ուժը ներկայացնող պատգամավորը համաձայն չէ միջազգային կառույցներում աշխատանքի՝ անհետևանք մնալու գնահատականների հետ․

«Պետք է հստակ արձանագրենք, որ մեր քննարկմանը հետևել է Բյուրոյի որոշում, որով զեկույցի տեսք կստանա այս քննարկման բովանդակությունը։ Եվ կա որոշում, որ Բյուրոն այս քննարկման արդյունքում ձևավորված խոսույթի արդյունքում հարցը կուղարկի մոնիթորինգի հանձնաժողով։ Այսինքն՝ կարող ենք արձանագրել, որ բանաձևի տեսք կստանա այս քննարկումը։ Հայկական պատվիրակությունը պետք է աշխատի, որպեսզի հանձնաժողովում չկանգնի գործընթացը։ Ադրբեջանի դիմադրությունը հաղթահարելի է»։

-Ինչո՞ւ ՀՀ իշխանությունը նախընտրեց Հայաստան հրավիրել ԵՄ-ի դիտորդներին, և ոչ՝ ՀԱՊԿ-ի։ Այս հարցով ռուսական ԱԳՆ-ն է մտահոգություն արտահայտել՝ ակնարկելով առաջիկայում սրացումների հավանականությունը․

«ՀԱՊԿ-ի առաքելություն եկել է Հայաստան սեպտեմբերի 13-ից հետո, սակայն պարզ չէ՝ ինչ են արձանագրել։ ՀՀ-ն առաջնորդվում է իր անվտանգության ապահովման բոլոր հնարավոր գործիքակազմերով։ Այս պարագայում՝ արձագանքել է ԵՄ-ն։ ՀԱՊԿ-ը չի արձանագրել Ադրբեջանի ներխուժման փաստը։ Անհապաղ տեղակայվում են որտե՞ղ, եթե նրանց պարզ չէ՝ որտեղով է անցնում Հայաստան-Ադրբեջան սահմանը»,- ասաց Սոնա Ղազարյանը։

Հարցազրույցն ամբողջությամբ՝ տեսանյութում։

Ռոբերտ Անանյան