«Շեֆի» ոտքի տակ գառ մորթելը և բարեփոխումների իմիտացիան. ապաքաղաքական զրույց Դավիթ Հովհաննիսյանի հետ. ՏԵՍԱՆՅՈՒԹ

Factor TV-ի A-Politic հաղորդաշարի հյուրն է Քաղաքակրթական և մշակութային հետազոտությունների կենտրոնի տնօրեն Դավիթ Հովհաննիսյանը:

Նրա կարծիքով՝ դժվար է միանշանակ պատասխանել հարցին՝ արդյո՞ք վերջին 20-30 տարիներին հետխորհրդային որոշ երկրներ, ինչպես նաև Լիբիան, Սիրիան, Իրաքը կամ Աֆղանստանը, առաջընթաց են ապրել: Ամեն ինչ կախված է «չափման միավորներից» և այն խմբերից, որոնք դիտարկվում են կյանքի բարելավման կամ վատթարացման տեսանկյունից: Անհրաժեշտ է պատասխանել նաև հետևյալ հարցին՝ այդ երկրներում անցկացվում էին բարեփոխումնե՞ր, թե՞ դրանց իմիտացիան:

Ըստ արևելագետի՝ արաբական որոշ երկրներում, մասնավորապես, Ալժիրում և Եգիպտոսում, համեմատաբար արդար ընտրություններով իշխանության էին եկել ծայրահեղ իսլամիստները և ցանկացել էին «ջիհադի» օրենքներ մտցնել: Սակայն դրանից հետո այդ երկրներում տեղի են ունեցել զինվորական հեղաշրջումներ և վերականգնվել են աշխարհիկ կարգերը: Ժողովրդավարությունը, այդպիսով, կարող է հանդես գալ ծեսի (օրինակ՝ ընտրությունների) տեսքով, իսկ կարող է նաև լինել այդպիսին՝ իր ներքին բովանդակությամբ:

Հաղորդման հյուրը համաձայն չէ, որ ազատական նախագիծը Հայաստանում տապալվել է։ Նրա կարծիքով՝ այն լրջորեն չի էլ սկսվել: Մինչև 1994-ը պատերազմի և սոցիալական դժվարությունների շրջան էր, այնուհետև աստիճանաբար հաղթում էր գողությունն ու ավազակությունը: Մոտավորպես 2010-ականներից սկսվել է «լճացման» շրջանը, երբ որևէ նախագիծ հնարավոր չէր իրականացնել։ Այժմ, ըստ Դավիթ Հովհաննիսյանի, անհրաժեշտ է հրաժարվել «ֆեոդալիզմի» մնացուկներից։ Երբ որևէ «շեֆի» ոտքի տակ գառ են մորթում, դա բոլոր բարեփոխումների վերջն է: Սրանից ելնելով՝ նա կարևորում է դաստիարակությունը, կրթությունը, օրենքների անշեղ կատարումը:

Մանրամասները՝ տեսանյութում:

Արամ Աբրահամյան