27.06.2026 | 06:03
ԱԱ-2026. Իսպանիան հաղթեց Ուրուգվային, Կաբո Վերդեն նույնպես դուրս եկավ փլեյ-օֆֆ. ՏԵՍԱՆՅՈՒԹ
Բողոքի ակցիայի մասնակիցները երթով հասան ՆԳՆ. պահանջում են պատժել Տիգրան Ուլուբաբյանին խnշտանգած ոստիկաններին
Հասարակություն
23.03.2025 | 17:32
Քննչական կոմիտեի շենքի դիմաց այսօր կրկին բողոքի ակցիա է իրականացվել՝ ի պաշտպանություն Ոստիկանության Վանաձորի բաժնում ենթադրյալ բռնության ենթարկված Տիգրան Ուլուբաբյանի: «Ո՛չ բռնապետությանը», «Ո՛չ խտրականությանը» «Արդարություն», վանկարկումներով բողոքի ակցիայի մասնակիցները Քննչական կոմիտեից երթով քայլեցին դեպի Ներքին գործերի նախարարություն:
Տիգրան Ուլուբաբյանի պաշտպան Ռոման Երիցյանը լրագրողների հետ զրույցում նշել է, որ համոզված է՝ արցախցի լինելու հանգամանքով է պայմանավորված ոստիկանության խտրական վերաբերմունքը:
«Ես թվարկել եմ բազմաթիվ քննչական գործողություններ, որոնք պետք է կատարվեին Տիգրան Ոլուբաբյանի ահազանգի հետ կապված, սակայն դրանք անելու փոխարեն հրապարակում են անում, թե, իբր, ես կեղծիք եմ տարածում: Ես, այլընտրանք չունենալով, տեսնելով, որ իրավական ճանապարհով արդարության հասնելը հնարավոր չէ, որոշել եմ հանրային եղանակով պայքարել, զերծ պահել ոստիկանների խտրական վերաբերմունքից, որը դրսևորվում է բոլորիս նկատմամբ»,- ասել է Երիցյանը:
Երիցյանի խոսքով՝ իր նկատմամբ ոստիկանությունը հետապնդում է սկսել և ստիպում է մարդկանց իր դեմ հաղորդում տալ: Ըստ փաստաբանի՝ մի կին հաղորդում է ներկայացրել՝ իբր ինքը խարդախությամբ նրանից մեծ գումար է վերցրել և հաղորդումն արդեն ուղարկվել է Քննչական կոմիտե:
ԱԺ ընդդիմադիր պատգամավոր Տիգրան Աբրահամյանի խոսքով՝ Հայաստանում վերջին տարիներին խախտվում են ոչ միայն արցախցիների, այլ նաև մեծ թվով ՀՀ քաղաքացիների իրավունքները։
«Այսօր Հայաստանում մեծ թվով քաղբանտարկյալների գոյությունը և քաղաքական հետապնդումները ցույց են տալիս, որ այստեղ խնդիրը միայն արցախցի լինելը չէ: Սակայն թիրախավորվում են հատկապես այն արցախցիները, ովքեր խոսում են Արցախի հանձնման, Արցախ վերադարձի և արցախցիների նկատմամբ որոշակի առանձնացված մոտեցումների մասին»,- ասաց Աբրահամյանը։
Հիշեցնենք, որ արցախցի Տիգրան Ուլուբաբյանը բարձրաձայնել է այն մասին, որ ոստիկանության Վանաձորի բաժնում իրեն խոշտանգել են, հայհոյել են, ծեծի ենթարկել, թքել վրան՝ հորդորելով խոստովանել, որ ավազակային հարձակում է կազմակերպել իր բարեկամի տան վրա: Ուլուբաբյանը չի խոստովանել, իսկ ազատ արձակվելուց հետո բարձրաձայնել է իր հետ տեղի ունեցածի մասին, նախաձեռնվել է քրեական վարույթ:
