Բուհերի չկայացած միավորում, մանկավարժների «սով», նախարարի հրաժարական. կրթական թեժ տարվա ամփոփումը․ ՏԵՍԱՆՅՈՒԹ

Ռիսկեր պարունակող օրենսդրական նախագծեր, մանկավարժների պակաս, բուհերի միավորման նախաձեռնություն, թափուր տեղերի թվի ռեկորդ, բողոքի ակցիաներ, նախադպրոցական հաստատությունում երեխայի նկատմամբ ենթադրյալ բռնության դեպք. 2022-ին Հայաստանի կրթական ոլորտում աղմկահարույց զարգացումների պակաս չեղավ։ Դրանցից շատերը հանրային քննարկումների առանցքում էին շաբաթներ, անգամ՝ ամիսներ շարունակ։ Factor TV-ն ի մի է բերել այդ իրադարձությունները։

Կրթության ոլորտի փորձագետների համար 2022-ի ամենամտահոգիչ փաստերից մեկն այն էր, որ Հայաստանում շուրջ 21 հազար շրջանավարտներից մանկավարժ դառնալու համար դիմել է ընդամենը 500-ը: «Հանրակրթության մասին» օրենքում փոփոխությունների վերաբերյալ խորհրդարանական լսումների ժամանակ այս մասին հայտարարեց ԿԳՄՍ նախարարի տեղակալ Ժաննա Անդրեասյանը:

Պարզվում է՝ պետությունը կանգնած է դպրոցներն ուսուցիչներով համալրելու լուրջ մարտահրավերի առաջ: Երբ սկսեց շրջանառվել ուսուցիչների աշխատավարձի բարձրացման թեման, թվում էր` դա պետք է ոգևորի ոլորտի ներկայացուցիչներին, բայց արի ու տես, որ ի հայտ եկան որոշ տարակարծություններ: Կառավարությունն ընդունեց ԿԳՄՍ նախարարության նախագիծը, որով առաջարկվում էր կամավոր ատեստավորում անցած ուսուցիչների դրույքաչափը դարձնել 200 հազար դրամ, ատեստավորված ուսուցիչներին տրամադրել 30-50 տոկոս հավելավճար:

Փոխնախարար Ժաննա Անդրեասյանն իր հերթին հայտարարեց, որ ավելի քան երկու տասնյակ ուսուցիչ մայիսից սկսած կստանա շուրջ 400 հազար դրամ և ավելի վարձատրություն: Կրթության փորձագետներից ոմանք, սակայն, պնդեցին, որ նախարարության ներկայացրած թվերը մանիպուլյատիվ են՝ հայտարարելով, որ 400 հազար դրամ աշխատավարձ ստացող ուսուցիչ Հայաստանում փաստացի չկա: Ժաննա Անդրեասյանը, սակայն, շարունակեց պնդել, որ կան ուսուցիչներ, որոնք նախքան ատեստավորումն ու տարակարգի տրամադրումը ստանում էին ընդամենը 117 հազար դրամ աշխատավարձ, այնինչ նրանց աշխատավարձը հասել է անգամ 450 հազար դրամի։

Արդեն նոյեմբերին ՀՀ Վարչապետ Նիկոլ Փաշինյանը հայտարարեց` Կառավարության նպատակն է, որ Հայաստանում ուսուցիչները ստանան 800 հազար, 900 հազար, 1 մլն 200 հազար դրամ աշխատավարձ: Թե երբ հնարավոր կլինի հասնել այս նպատակի իրագործմանը, վարչապետն այդպես էլ չնշեց։

Թեժ մթնոլորտում անցան մայրաքաղաքի Չեխովի անվան թիվ 55 դպրոցի տնօրենի ընտրությունները: Դրանք ձախողվեցին երեք անգամ: Եվ մինչ դպրոցում տնօրենի ընտրություններ էին անցկացվում, բակում մի խումբ ծնողներ ու աշակերտներ բողոքի ակցիա էին անում։ Նրանց մի մասը պաշտպանում էր նախկին ժամանակավոր պաշտոնակատար Տաթևիկ Մելքոնյանին և դեմ էր տնօրենի պաշտոնում Դիանա Մինասյանի ընտրությանը: Ասում էին` Մինասյանը չունի մանկավարժական կրթություն, դպրոցում աշխատելու և աշակերտների հետ շփվելու փորձ։ Ցուցարարները պնդում էին՝ Մինասյանը նախկին փոխվարչապետ Տիգրան Ավինյանի ընկերոջ կինն է, իսկ նրա քույրն աշխատում է Կառավարությունում: Արդյունքում արդեն հունիսին, չնայած բողոքի ալիքին, չորրորդ փորձից տնօրեն ընտրվեց տնօրենի ժամանակավոր պաշտոնակատար Դիանա Մինասյանը։

Տարեսկզբին հանրությանը ցնցեց Երևանի թիվ 124 մանկապարտեզում երեխայի նկատմամբ խոշտանգման մասին ահազանգը: Կինը ոստիկանություն հաղորդում էր ներկայացրել այն մասին, որ մանկապարտեզի դայակները, դաստիարակները, հաշվի առնելով իր երեխայի հոր` պակիստանցի լինելու հանգամանքը, խմբի երեխաների միջոցով 2 տարի շարունակ բռնության են ենթարկել երեխային։ Մոր խոսքով՝ ամեն ինչ սկսվել է դեռևս 2019-ին. երեխային կտտանքների են ենթարկել, ծաղրել ու սպառնացել: Երբ երեխան տանը լացել է և ասել, որ գլուխը ցավում է, մայրը նրան տարել է բուժզննման։ Պարզվել է՝ երեխան գլխին իսկապես հարված է ստացել։ Արդյունքում հարուցվեց քրեական գործ` ՀՀ քրեական օրենսգրքի 119-րդ հոդվածի 2-րդ մասի 6-րդ և 7-րդ կետերով՝ ֆիզիկական ուժեղ ցավ կամ հոգեկան ուժեղ տառապանք պատճառելը, որոնք կատարվել են առանձին դաժանությամբ, ազգային, ռասայական կամ կրոնական ատելության կամ կրոնական մոլեռանդության շարժառիթով։ Շուտով կլրանա գործ հարուցելու 1 տարին, բայց այն դեռևս դատարան չի հասել։

Մանրամասները` տեսանյութում:

Աննա Բաբաջանյան