20.12.2025 | 20:00
100,000 ռուբլի՝ ՀՀ-ում լրտեսության համար․ ՌԴ քաղաքացիները Հայաստանում տվյալներ են հավաքել․ ՏԵՍԱՆՅՈՒԹ
Թուրքիայի ԱԳ նախարարը կոչ է արել գործնականում իրականացնել PKK-ի լուծարումը
Քաղաքականություն
12.05.2025 | 22:55
Թուրքիայի արտգործնախարար Հաքան Ֆիդանը Քուրդիստանի աշխատավորական կուսակցության (PKK) կողմից լուծարման և զինաթափման մասին հայտարարությունը որակել է որպես «պատմական և կարևոր», գրում է Turkiye today-ը։
«Սա պատմական և կարևոր որոշում է։ Ես այս որոշումը համարում եմ չափազանց նշանակալից։ Եթե այն անկեղծորեն իրականացվի, կարծում եմ, որ օգտակար կլինի բոլորի համար»,- ասել է Ֆիդանը Անկարայում իր հորդանանցի և սիրիացի գործընկերների հետ մամուլի ասուլիսի ժամանակ։
Ֆիդանը շեշտել է՝ հայտարարությանը պետք է հետևեն կոնկրետ գործողություններ։
«Այս որոշումից հետո կան գործնական քայլեր, որոնք պետք է ձեռնարկվեն։ Մենք դրանք ուշադիր կհետևենք։ Մեր ամենամեծ ցանկությունն է, որ սա տարածվի Թուրքիայի սահմաններից դուրս և դրականորեն ազդի մեր տարածաշրջանի մյուս մարդկանց վրա»,- հավելել է նա։
Ասուլիսում անդրադարձ է կատարվել տարածաշրջանային ավելի լայն հարցերի, մասնավորապես, Սիրիայի առջև ծառացած մարտահրավերներին: Ֆիդանն Իսրայելի «էքսպանսիոնիստական քաղաքականությունը» որակել է որպես տարածաշրջանային կայունության հիմնական սպառնալիք։
«Սիրիայի առջև ծառացած դժվարությունները բազմաչափ են և լուրջ։ Այս իրավիճակը վտանգում է ոչ միայն Սիրիայի, այլև ամբողջ տարածաշրջանի անվտանգությունն ու կայունությունը: Որպես տարածաշրջանային երկրներ՝ մենք կարծում ենք, որ այս էքսպանսիոնիզմը պետք է դադարեցվի»,- ասել է Ֆիդանը։
Հիշեցնենք, որ այսօր ավելի վաղ Քուրդիստանի աշխատավորական կուսակցությունը (PKK) հայտարարել էր լուծարման մասին՝ նշանավորելով թուրքական պետության դեմ չորս տասնամյակ տևած զինված ապստամբության ավարտը։
Թարգմանությունը՝ Էմմա Չոբանյանի
