06.10.2026 | 15:10
Ընդդիմադիրները Պապիկյանի հրաժարականն են պահանջում // Գեղարքունիքում ուսուցիչը ծեծել է աշակերտուհուն․ ԼՈՒՐԵՐ
Բրիտանական Anglo Asian Mining-ը դիմել է միջազգային կառույցներին Արցախի հանքավայրերի շահագործման հարցով
Քաղաքականություն
20.12.2022 | 17:03
Բրիտանական Anglo Asian Mining ընկերությունը նամակ է ուղարկել մի շարք միջազգային կազմակերպությունների բարձրաստիճան պաշտոնյաների ու կառավարությունների ներկայացուցիչների, այդ թվում՝ ՄԱԿ-ին, ԱՄՆ Պետքարտուղարությանը, Մեծ Բրիտանիայի ԱԳՆ-ին, ԵՄ-ին՝ Արցախի հանքավայրերի գործունեության կապակցությամբ, գրում են ադրբեջանական լրատվամիջոցները։
«Ընկերությունը խնդրում է այս իշխանություններից աջակցություն՝ վերականգնելու իրենց օրինական բիզնես իրավունքները և ապահովելու անգլոասիացի աշխատակիցների անվտանգ ֆիզիկական մուտքը Դրմբոնի և Կաշենի հանքեր ու Ղարաբաղի հարակից հետախուզական տարածքներ»,- ասվում է հայտարարության մեջ:
Նշվում է, որ 2006 թվականին, իբր, ընկերությունը նմանատիպ նակամներ է ուղարկել՝ «պաշտոնապես հաստատելու իր սեփականության առաջնահերթությունը»։
Հավելենք, որ 2021թ․ հոկտեմբերին պարզ էր դարձել, որ բրիտանական «Anglo Asian Mining» (AAM) ընկերությունն Ադրբեջանի հետ պայմանագիր է կնքել նոր հանքավայրերի մշակման համար։
««Anglo Asian Mining»-ը Ադրբեջանի կառավարության հետ փաստաթուղթ է ստորագրել հիմնական դրույթների մասին, որոնք ընկերությանը հնարավորություն են տալիս շահագործել երեք նոր հանք՝ 882 քառ․/կմ ընդհանուր տարածքով։ Բոլորն ընդգրկվելու են Արտադրանքի կիսման գործող համաձայնագրում։ Բոլոր երեք հանքերում աշխատանքները սկսվելու են Ադրբեջանի Մեջլիսում պայմանագրի վավերացումից հետո»,- ասվում էր ընկերության հայտարարության մեջ։
Նոր պայմանագրի համաձայն՝ ընկերությունը հրաժարվում էր Սոթքի ոսկու հանքավայրի պայմանագրային տարածքի իրավունքից։ Anglo Asian Mining-ը նշում էր, որ Մեջլիսում պայմանագրի փոփոխությունների վավերացումից հետո Ադրբեջանում ընկերությունը կունենա 8 պայմանագրային տարածք՝ 2 հազար 544 քառ. կմ ընդհանուր մակերեսով:
Երրորդ պայմանագրային տարածքը հայկական Կաշենի հանքն է, որը մոտ է Դրմբոնին։ Երկուսն էլ գտնվում են հայկական վերահսկողության տակ։
«Ադրբեջանի կառավարությունը բոլոր ջանքերը կգործադրի՝ Դրմբոնի և Կաշենի պայմանագրային տարածքներ ֆիզիկական մուտք ապահովելու համար»,- ասվում է ընկերության հայտարարության մեջ։
Էմմա Չոբանյան
