Երեխայի ձեռքից հեռախոս վերցնելը ելք չէ․ ինչպես խոսել պատերազմի մասին․ Մեդիագիդ՝ Մարի Ամիրխանյանի հետ․ ՏԵՍԱՆՅՈՒԹ

Ինչպե՞ս հոգ տանել երեխաների մասին պատերազմների, ռազմական բախումների և լարված իրավիճակների ժամանակ, և ի՞նչ անել, երբ ձեր երեխան 18+ և դաժան տեսարանների հղումներ է սեղմում։ Factor TV-ի տաղավարում այս մասին է խոսել հոգեբան Մարի Ամիրխանյանը։

Հոգեբանի խոսքով՝ կարևոր է երեխաներին իրենց հասանելի ու հասկանալի բառերով բացատրել ներկա իրավիճակը՝ օբյեկտիվ և արդար կերպով։

«Չեմ կարծում, թե երեխայի ձեռքից հեռախոս վերցնելը ելք է։ Ինտերնետը գործիք է, և որքան շուտ երեխա-ծնող շփման մեջ հայտնվի այդ փաստը, այդքան ավելի քիչ կլինեն խնդիրները։ Մենք մտածում ենք՝ վերցնենք հեռախոսը, և երեխան պաշտպանված է, բայց այդպես մենք ջերմոցային պայմաններով ենք մեծացնում նրան, ոչ մի կերպ չենք կարողանում օգնել՝ ավելի առողջ իմունիտետ ձեռք բերել կյանքի դժվարությունների հետ մեկտեղ։ Շատ ավելի ճիշտ է նրա հետ միասին անցնել այդ ճանապարհը, հասկանալ՝ որն է իրական ինֆորմացիա, որը՝ ֆեյք, ինչն է, որ արժե լսել ու հասկանալ, և ինչն է աղբ է»,-ասում է հոգեբանը։

«Մեդիագիդ» նախագիծը նպատակ ունի պարզ և մատչելի լեզվով պատմել մեդիայի ու ընթերցողի խնդիրների մասին, վեր հանել թեմաներ, որոնք այժմեական են, արդիական ու կարող են կողմնորոշել լսարանին՝ Fake news-ից խուսափելու և տեղեկատվության արժանահավատ աղբյուրներ ընտրելու հարցում։ 

Ընտրված թեմաներն ընդգրկում են ինչպես ամենօրյա լրահոսի միջոցով «ապահով» տեղեկատվություն ստանալու ուղիները, այնպես էլ տեղեկատվական հոսքերում կողմնորոշվելու, բովանդակություն ֆիլտրելու և տեղեկատվության հետ աշխատելու համար կարևոր հմտությունների քննարկումը։ 

Ծրագիրը ֆինանսավորվում է Լիտվայի զարգացման համագործակցության և ժողովրդավարության զարգացման ծրագրի կողմից։

Մանրամասները՝ տեսանյութում։

Անահիտ Հակոբյան