«Կտուրից ընկած կույսերին ցույց տալն ամոթ է, խայտառակություն և դեգրադացիա». Արման Երիցյան. ՏԵՍԱՆՅՈՒԹ

«Կտուրից ընկած կույսերին ցույց տալն ամոթ է, խայտառակություն և դեգրադացիա: Դա է իրենց ֆորմատը` պետք է կույս լինես և կտուրից ընկնես: Ասում են` կա պահանջարկ, դրա համար ենք նմանատիպ պրոդուկտ արտադրում, բայց եթե ցույց տան գրագետ, դինամիկ, լավ ֆիլմեր, հեռուստադիտողը ցուցադրողի ճակատն էլ կհամբուրի»,- Factor TV-ի հետ զրույցում նման տեսակետ է հայտնում կինոռեժիսոր Արման Երիցյանը` անդրադառնալով կենտրոնական հեռուստաընկերություններից մեկով վերջերս եթեր հեռարձակված մի սերիալի, որտեղ արծարծվում էր մեր հանրության համար տաբու համարվող թեմա` կուսության թեման, և սերիալի հերոսուհին առաջին ամուսնական գիշերը պատմում էր ամուսնուն, որ ընկել է կտուրից և կորցրել կուսությունը:

Արման Երիցյանի խոսքով` հանրությունը անորակ պրոդուկտ չի ուզում, հեռուստաընկերություններն են պարտադրում դա. «Մեդիան իրենց անգրագիտությամբ մենաշնորհել են, խելացիներին էլ քացով խփել, դուրս են մղել ոլորտից»,- ասում է նա:

Կինոռեժիսորի խոսքով` ԿԳՄՍ նախարարությունը վաղուց մշակույթով չի զբաղվում. «Մշակույթի նախարարների հարցում միշտ ունեցել ենք լուրջ խնդիր: Ներկայիս նախարարն էլ մշակույթի հետ կապ չունի: Դա ցուցիչն է այն բանի, որ մշակույթին մատների արանքով ենք նայում»,-շեշտում է մեր զրուցակիցը:

Նա խոսում է Հայաստանում պրոդյուսեր-պետություն-ստեղծագործող համագործակցության «հիվանդ ու տկար» լինելու մասին. «Եթե քո ֆիլմը հաղթել է, ասենք, «Ոսկե Ծիրանում», տեղական հեռուստաընկերությունները պետք է ընկնեն ռեժիսորի հետևից ու խնդրեն, որ վերջինս ֆիլմը ցուցադրելու հնարավորություն տա: Պետք է վճարեն ռեժիսորին: Մինչդեռ իրենց թվում է, թե հեղինակը պետք է վճարի սարդոստայնների մեջ կորած տաղավարներով հեռուստաընկերությանը իր ֆիլմը ցուցադրելու համար: Պետք է գան խնդրեն, վճարեն, և ներողություն խնդրեն, որ քիչ են վճարում:Սակայն պետությունը չունի մշակութային ճաշակ: Պետական քարոզչամիջոցները հանրությանը ոչ միայն չեն սերմանում ճաշակ, այլև տանում են դեգրադացիայի»:

Մանրամասները` տեսանյութում:

Աննա Բաբաջանյան