«Զենք ենք խնդրում»․ ինչ իրավիճակ է մեկ տարի առաջ ճանապարհից զրկված Որոտանում․ ՏԵՍԱՆՅՈւԹ

Որոտանը Գորիսի հետ կապող դժվարանցանելի հողե ճանապարհը տեղի բնակիչները սկսել են օգտագործել, երբ ադրբեջանական կողմն անցակետ տեղադրեց հիմնական ավտոճանապարհին՝ նրանց զրկելով մայրուղուց օգտվելու հնարավորությունից։ Այստեղ ասֆալտապատում չի իրականացվում։ Ճանապարհի՝ Ադրբեջանի վերահսկողության տակ անցնելուց տևական ժամանակ անց Factor TV-ն այցելել է Որոտան՝ հասկանալու համար, թե ինչպե՞ս են որոտանցիները կազմակերպում իրենց առօրյան ճանապարհի բացակայության պայմաններում։

«Ուշադրություն, դուք մտնում եք Ադրբեջանի տարածք». Գորիս-Կապան միջպետական ճանապարհի Որոտանի հատվածում այս գրությամբ ցուցանակը հայտնվեց մոտ մեկ տարի առաջ՝ 2021 թվականի օգոստոսի 26-ին, որին հաջորդեց ադրբեջանական ոստիկանության հենակետերի, իսկ մի քանի ամիս անց՝ նաև մաքսակետերի տեղադրումը։ Արդեն մեկ տարի է՝ Սյունիքի մարզի Որոտան, Շուռնուխ և Բարձրավան համայնքների բնակիչները, նախկին 15 րոպեի փոխարեն, մեկ ժամում են հասնում Գորիս՝ երթևեկելով էքստրեմալ պայմաններում։ Ոչ բոլոր տաքսու վարորդներն են պատրաստ այլընտրանքային այս ճանապարհով Գորիսից Որոտան հասնել։

Որոտանում ճանապարհի խնդրի լուծումն առաջնային են համարում, բայց պատմելու քիչ բան կա, ասում են։ Գյուղի կապը բոլոր առումներով Գորիսի հետ է։ Որոտանցիները, սակայն, շաբաթվա մեջ ընդամենը երկու անգամ «Ուրալ» մակնիշի մեքենայով են գնում քաղաք։

Գորիս գնացող միակ փոխադրամիջոցի երթուղու օրերը չեն համընկնում խաղաղության մասին երազող Հայկազի դհոլի դասերի օրերի հետ։ Նա՝ դհոլի, երկվորյակ եղբայրն էլ՝ շվիի պարապմունքներն են դադարեցրել։

Որոտանում տրանսպորտից ու ճանապարհից զատ՝ անվտանգության ապահովումն են առաջնային համարում։ Թշնամին մի քանի մետրի վրա է կանգնած։ Այստեղ գյուղը լքելու տրամադրություններ չնկատեցինք։ Մեզ հետ զրուցող որոտանցիները, սակայն, շեշտեցին՝ պետությունը պետք է ապահովի գոնե նվազագույն կենսական պայմաններն ու հաղորդակցության հնարավորությունները, որպեսզի իրենք կարողանան ապրել Որոտանում։

Մանրամասները՝ տեսանյութում։

Նարեկ Կիրակոսյան