Զեղչ բառը կնշանակի զեղչ, ոչ թե իմիտացիա․ ի՞նչ է նախատեսում զեղչերի մասին նոր օրենքը․ ՏԵՍԱՆՅՈՒԹ

Մրցակցության պաշտպանության հանձնաժողովի նախաձեռնությամբ փոփոխություններ ու լրացումներ են կատարվել «Առևտրի և ծառայությունների մասին», ինչպես նաև հարակից օրենքներում:

Հուլիսի 31-ից ուժի մեջ են մտնելու ակցիաների, այդ թվում՝ զեղչերի իրականացման վերաբերյալ կարգավորումները: Այս մասին այսօր մամուլի ասուլիսում հայտարարեց Մրցակցության պաշտպանության հանձնաժողովի անդամ Տիգրան Մարկոսյանը:

«Հաճախ տնտեսվարղները ներկայացնում են որոշակի զեղչ, սակայն պարզվում է, որ այդ զեղչն իրականում ավելի բարձր է, քան մինչ զեղչի կիրառումը ապրանքի գինն է եղել:

Մեկ այլ դեպքում զեղչերի վերաբերյալ տեղեկատվություն է տրվում թերի կամ ոչ հավաստի կամ ոչ ամբողջական: Հայտարարվում է զեղչի կամ ակցիայի մասին, բայց պարզվում է, որ դրա արդյունքում որևէ դրական գնային փոփոխություն կամ պայման չի առաջարկվում քաղաքացուն:

Մեկ այլ դեպքում էլ տնտեսվարողները հայտարարում են զեղչ, սակայն պարզվում է, որ  տվյալ ակցիան տևել է տարիներ, հետևաբար, դա չի կարող իր բնույթով համարվել ակցիա:

Հարցը շատ զգայուն է, որովհետև օրենսդրական խիստ կարգավորումները կարող են վնասել բիզնեսին, բայց մյուս կողմից՝ սպառողին պաշտանելու կարիք կա»,- նշեց Մարկոսյանը՝ հավելելով, որ մասնագիտական հանրույթի կողմից կարգավորումների վերաբերյալ դրական արձագանքներ են եղել:

«Սա ոլորտում առաջին քայլն է, չի հավակնում լինել վերջնական և լուծումներ տալ բոլոր հարցերին: Եթե կլինեն սողանցքներ, որոնք տնտեսվարողներին թույլ կտան շրջանցելու և կրկին դրսևորելու անբարեխիղճ մրցակցության վարքագիծ, կամ կպարզվի, որ այդ կարգավորումներն անհամաչափ բեռ են տնտեսվարողների համար, ապա մենք պատրաստակամ ենք լսելու առաջարկներ և նոր կարգավորումներ անել»,- նշեց Մարկոսյանը:

Նոր կարգավորումների համաձայն՝ զեղչ է համարվում գնի իջեցումը` դրան նախորդող մեկ ամվա ընթացքում միջին գնի նկատմամբ: Զեղչը առավելագույնը կարող է տևել մինչև երեք ամիս:

Ինչ վերաբերում է այլ բնույթի ակցիաներին, չես կարող մի ապրանքի հետ նվեր տալ, բայց ապրանքի գինն այնքան բարձրացնես, որ նվերի գինը լրիվ կամ մասնակի ներառվի դրա մեջ: Ակցիայի դեպքում ևս այն չի կարող տևել 3 ամսից ավելի»,- նշեց ՄՊՀ-ի անդամը:

Նրա խոսքով՝ օրենսդիրը օրենքի մակարդակով սահմանել է, թե ինչպիսին պետք է լինեն իրազեկմանը վերաբերող պահանջները:

Իրազեկման մեջ պետք է նշվեն զեղչի կամ ակցիայի ժամկետները, նաև թե ինչի վրա է այն տարածվում:

«Եթե նշվում է մինչև 50 տոկոս զեղչ, դա ենթադրելու է, որ զեղչված ապրանքներից առնվազն 20 տոկոսը պետք է լինի 50 տոկոս զեղչով»,-ասաց Մարկոսյանը:

Նա նաև հավելեց, որ անբարեխիղճ սպառողները կենթարկվեն տուգանքների՝ մինչև նախորդ տարվա հասույթի 5 տոկոսի չափով:

Մարկոսյանն ընդգծեց, որ այսուհետ զեղչ բառը կնշանակի հենց զեղչ, ոչ թե ինչ-որ իմիտացիա:

Մանրամասները՝ տեսանյութում: