16.09.2026 | 13:33
«Պետք ա ձեզ «պոնչո» անեինք, ասեինք՝ ապրե՛ս, լո՞ւրջ». Խամոյանը՝ Հարությունյանին․ ՏԵՍԱՆՅՈՒԹ
Աշխարհի բնակչության աճի տեմպն առաջին անգամ պակաս է եղել 1%-ից
Քաղաքականություն
11.07.2022 | 20:44
Աշխարհի բնակչության աճի տեմպերը, 1950 թվականի վիճակագրության սկզբից ի վեր առաջին անգամ, նվազել են տարեկան մեկ տոկոսից ցածր։ Այս մասին հայտնում է «Երկրի բնակչություն» (Stiftung Weltbevölkerung – DSW) գերմանական հիմնադրամը, փոխանցում է DW-ի ռուսական ծառայությունը։
Փորձագետները վերլուծել են ՄԱԿ-ի ժողովրդագրական վիճակագրությունը և եզրակացրել, որ այդ ցուցանիշը կազմում է 0,8 տոկոս։ Միաժամանակ, աշխարհում կյանքի տևողությունը, 2019 թվականի համեմատությամբ, նվազել է 1,8 տարով՝ մինչև 71 տարի։ Սա առաջին հերթին պայմանավորված է կորոնավիրուսային համաճարակով, բացատրում են հիմնադրամի վերլուծաբանները։
Այս անկումը չի նշանակում համաշխարհային ժողովրդագրական միտումների փոփոխություն՝ ընդգծում են հաշվարկների հեղինակները։ Բացարձակ թվով Երկրի բնակչությունը շարունակում է աճել. այժմ մոլորակում ապրում է 7,977,000,000 մարդ, մինչև նոյեմբերի 15-ը մարդկանց թիվը կհասնի 8 միլիարդի, կանխատեսում են ժողովրդագիրները։
Աշխարհի բնակչությունը ներկայում ավելանում է տարեկան մոտ 66 միլիոն մարդով կամ օրական 180․000-ով։ Ընթացիկ կանխատեսումների համաձայն՝ 2080-ականներին բնակչության թիվը կհասնի գագաթնակետին՝ մոտ 10,4 միլիարդ մարդ: Բնակչության շարունակական արագ աճը պայմանավորված է հիմնականում զարգացող երկրներում ծնելիության բարձր մակարդակով:
«Մոլորակի հարավում շատ կանայք դեռ ավելի շատ երեխաներ են ունենում, քան կցանկանային: Դրա մասին է վկայում ծնելիության բարձր մակարդակը, օրինակ, Աֆրիկայում՝ Սահարայից հարավ ընկած»,- նշել է Հիմնադրամի գործադիր տնօրենի տեղակալ Անժելա Բերը:
Տարածաշրջանում մեկ կնոջը միջինը 4,6 երեխա է բաժին ընկնում, ինչը երկու անգամ գերազանցում է համաշխարհային միջինը: Պատճառը, ըստ Բեհրի, սեռական դաստիարակության բացակայությունն է և հակաբեղմնավորիչների վատ հասանելիությունը։
Տաթև Ֆռանգյան
