09.10.2026 | 15:23
ԱԱԾ-ն հերքում է Մեղրիում ադրբեջանցիների լինելու լուրը // Ադրբեջաներեն երգ՝ Փաշինյանի տեսանյութում․ ԼՈՒՐԵՐ
Թուրքիայում արգելափակվել են DW և «Ամերիկայի ձայնը» լրատվամիջոցների կայքերը
Քաղաքականություն
01.07.2022 | 23:30
Թուրքիայում արգելափակվել է Deutsche Welle մեդիա ընկերության կայքը։ Համապատասխան որոշումը կայացրել է Անկարայի դատարանը։ Այս մասին հայտարարել է Թուրքիայի Ռադիոյի և հեռուստատեսության բարձրագույն խորհրդի (RTÜK) ներկայացուցիչը։ Խոսքը հեռարձակման բոլոր 32 լեզուներով կայքէջերի մասին է։
Լրատվականը մտադիր է դատարանում վիճարկել թուրքական կողմի դիրքորոշումը։ Բացի DW-ից՝ արգելափակվել է նաև «Ամերիկայի ձայն» ռադիոկայանի կայքը։
Դեռևս մի քանի ամիս առաջ RTÜK-ը արտասահմանյան հեռարձակողներից պահանջել էր դիմում ներկայացնել՝ ինտերնետ հեռարձակման լիցենզիա ստանալու համար։ Ըստ DW-ի՝ նման քայլը «թույլ կտա Թուրքիայի կառավարությանը գրաքննել խմբագրական բովանդակությունը», ինչն «անընդունելի կլինի անկախ լրատվամիջոցների համար»:
Փետրվարին Deutsche Welle-ն և «Ամերիկայի ձայնը» հայտարարել էին, որ չեն դիմելու Թուրքիայում արտոնագրի ստացման համար։ Թուրքական կողմի պահանջը հիմնված է իրավական նորմի վրա, որն ուժի մեջ է մտել 2019 թվականին։ Նույն թվականին DW-ն, համաձայն թուրքական օրենսդրության, բացել է իր ներկայացուցչությունը երկրում։
Միաժամանակ, Լրագրողների գերմանական միությունը կոչ է արել թուրքական կողմին՝ անհապաղ վերացնել լրատվամիջոցի դեմ կիրառված միջոցները։
«Deutsche Welle-ի արգելքը չի կարող բացատրվել որևէ կերպ՝ բացի Էրդողանի ավտոկրատիայի կամայականությունից»,- ասել է միության ղեկավար Ֆրենկ Իբերալը։
Էմմա Չոբանյան
