18.06.2026 | 14:44
Կիոկուշին կարատեով զբաղվող աղջիկների թիվն ավելանում է․ ինչ կարևորություն ունեն մարտարվեստները Հայաստանում
Բայդեն-Էրդողան հանդիպումից հետ ԱՄՆ վարչակազմն ազդարարել է Թուրքիային F-16 կործանիչների վաճառքին աջակցելու մասին
Քաղաքականություն
30.06.2022 | 14:26
ԱՄՆ վարչակազմը «կանաչ լույս» է վառել Թուրքիային F-16 կործանիչների հնարավոր վաճառքի համար՝ Մադրիդում ՆԱՏՕ-ի գագաթնաժողովի շրջանակում նախագահ Ջո Բայդենի և Թուրքիայի նախագահ Թայիփ Էրդողանի հանդիպումից հետո։ Երկու երկրների նախագահների հանդիպումը շուրջ 1 ժամ է տևել, հայտնում է Reuters-ը։
Հանդիպումից հետո Պենտագոնում պաշտպանության նախարարի միջազգային անվտանգության հարցերով օգնական Սելեստե Վոլանդերն ասել է, որ Թուրքիայի հզոր պաշտպանական կարողությունները կամրապնդեն ՆԱՏՕ-ի պաշտպանությունը:
«ԱՄՆ-ն աջակցում է Թուրքիայի կործանիչների արդիականացմանը, քանի որ այն ներդրում է ՆԱՏՕ-ի անվտանգության, հետևաբար՝ ԱՄՆ-ի անվտանգության գործում։ Այդ ծրագրերն աշխատանքային փուլում են և պետք է մշակվեն մեր պայմանագրային գործընթացներով»,- ասել է Վոլանդերը։
Հավելենք, որ դեռևս հոկտեմբերին Թուրքիան ԱՄՆ-ին խնդրել էր վաճառել Lockheed Martin-ի արտադրության 40 միավոր F-16 և շուրջ 80 արդիականացման հավաքածու:
Մարտին էլ Պետքարուղարությունը նամակ էր գրել ԱՄՆ Կոնգրեսի որոշ անդամներին, որոնք դեմ էին վաճառքին՝ ասելով, որ ԱՄՆ-ի պաշտպանական առևտրային կապերը Թուրքիայի հետ ծառայում են Վաշինգտոնի շահերին:
Վոլանդերի այս մեկնաբանությունները հնչում են մեկ օր անց այն բանից հետո, երբ Թուրքիան վերացրեց ՆԱՏՕ-ին Ֆինլանդիայի և Շվեդիայի անդամակցության հարցում վետոն:
«ԱՄՆ-ին ուղղված Թուրքիայի դիմումներն այս համաձայնագրի մաս չեն։ Այս համաձայնագիրը երեք երկրների միջև է՝ Թուրքիայի, Ֆինլանդիայի ու Շվեդիայի։ ԱՄՆ-ն դրա մաս չէ»,- լրագրողներին ասել է Պենտագոնի պաշտոնյան։
Էմմա Չոբանյան
