14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
Բաքվում ՌԴ դեսպանը հայտարարել է, թե «ԵՄ-ն ցանկանում է Ռուսաստանից խլել» հայ-ադրբեջանական հարաբերությունների կարգավորման նախաձեռնությունը
Քաղաքականություն
13.06.2022 | 21:30
Բաքվում ՌԴ դեսպան Միխայիլ Բոչարնիկովը հայտարարել է, թե Մոսկվան պատրաստ է ամեն կերպ աջակցել Ադրբեջանի և Հայաստանի միջև հարաբերությունների կարգավորման գործընթացին, գրում է «Ինտերֆաքս»-ի ադրբեջանական ծառայությունը։
Նա նշել է, որ 2020 թվականի նոյեմբերի 9-ի եռակողմ հայտարարությունը սկզբնական դեր է խաղացել Ադրբեջանի և Հայաստանի միջև հարաբերությունների կարգավորման ողջ գործընթացում։
«Ինչ վերաբերում է նրան, ինչն այժմ կոչվում է խաղաղության պայմանագիր, ապա առաջին քայլն արված է՝ արձանագրվել է երկու կողմերի՝ առաջ շարժվելու պատրաստակամությունը։ Բաքուն սեղանին դրել է Ադրբեջանի և Հայաստանի միջև միջպետական հարաբերությունների հաստատման հիմնական սկզբունքները։ Հայկական կողմն իր հերթին առաջ է քաշել իր առաջարկները։ Ռուսական կողմը պատրաստվում է ամենայն աջակցություն ցուցաբերել այս բանակցային գործընթացին»,-ասել է Բոչարնիկովը։
Պատասխանելով Հայաստանի և Ադրբեջանի հարաբերությունների կարգավորման հարցում Եվրամիության մասնակցության մասին հարցին՝ Բոչարնիկովն ասել է, որ «ԵՄ-ն լռում է այդ ուղղությամբ Ռուսաստանի ջանքերի մասին»։
«Կրկնում եմ՝ աշխատանքին հիմք է դրել վերոնշյալ եռակողմ հայտարարությունը։ ԵՄ-ի կողմից կա ցանկություն՝ Ռուսաստանից խլել նախաձեռնությունը և իրեն վերագրել այդ բոլոր ուղղություններում առաջընթացը։ Կուզենայի նաև նշել, որ ԵՄ վերջին հայտարարությունները լիովին լռում են վերոնշյալ հայտարարությունների առկայությունը, էլ չեմ խոսում այդ գործընթացում Ռուսաստանի դերի մասին»,- հայտարարել է ռուս դիվանագետը։
Այնուամենայնիվ, Բոչարնիկովը նշել է, որ ԵՄ-ն կարող է գործընթացին օգուտ բերել, եթե իր վրա վերցնի «տարածաշրջանում տրանսպորտային և տնտեսական կապերի ապաշրջափակման նախագծերի ֆինանսավորումը»։
Էմմա Չոբանյան
