27.04.2024 | 00:04
Կիրանցում ոստիկանությունը լուսաձայնային նռնակ կամ որևէ այլ հատուկ միջոց չի կիրառել․ ՆԳՆ
Արևմուտքին չի կարելի վստահել․ Էրդողանը կրկին բողոքել է Հունաստանում տեղակայված ամերիկյան ռազմաբազաներից
Քաղաքականություն
13.06.2022 | 16:24
Թուրքիայի նախագահ Ռեջեփ Թայիփ Էրդողանը Վան կատարած այցի ընթացքում երիտասարդների հետ հանդիպմանը կրկին անդրադարձել է Հունաստանին ու սպանալիքներ հնչեցրել Աթենքի հասցեին, գրում են թուրքական լրատվամիջոցները։
Հավելենք, որ վերջին օրերին Էրդողանը պարբերաբար իր ելույթներում անդրադառնում է Հունաստանին, հատկապես՝ երկրի վարչապետ Կիրիակոս Միցոտակիսին։ Այս անգամ ևս Էրդողանը բողոքել է, որ Միցոտակիսը իր հետ հանդիպումից հետո ԱՄՆ Կոնգրեսում ունեցած ելույթում դժգոհել է Թուրքիայից ու կոչ արել F-16 կործանիչներ չվաճառել Անկարային։
Նա հայտարարել է, թե իրենց «համբերությունն անսպառ չէ»։
«Ձեր նախնիները դա շատ լավ գիտեին դա, մի փորձեք դրանք նորից ու նորից թարմացնել, դա ձեզ վրա շատ թանկ կնստի»,-ասել է Էրդողանը։
Թուրքիայի նախագահը խոսել է նաև Հունաստանում առկա ամերիկյան ռազմաբազաներից։
«Ստեղծվել է 5+4 ռազմաբազա։ Երբ մենք հարցնում ենք նրանց՝ Հունաստանին, ինչո՞ւ եք ստեղծում, նրանք պատասխանում են՝ «Ռուսաստանի դեմ»։ Իսկ ի՞նչ եք դուք արել Ուկրաինայի համար Ռուսաստանի դեմ։ Նրանց խոսքերը սուտ են։ Այս Արևմուտքին չի կարելի վստահել»,- ասել է նա։
Էրդողանը նշել է, որ գիտության ու արվեստի հարցերում կարելի է համագործակցել, սակայն ոչ քաղաքականության․ «Արևմուտքի քաղաքականությանը վստահել չի կարելի։ Նրանք մինչև հիմա ԵՄ-ին մեր անդամակցության հարցում դանդաղում են»։
Հիշեցնենք, որ օրերս Էրդողանը կոչ էր արել Աթենքին հրաժարվել Էգեյան ծովի կղզիները ռազմականացնելուց ու զգուշացրել «չկրկնել անցյալի սխալները»։
«Նմանատիպ գործողությունները ոչնչի չեն բերի։ Թուրքիան չի ձգտում ոտնահարել այլ երկրների իրավունքները, սակայն դրա հետ մեկտեղ՝ թույլ չի տա իր ուղղությամբ հարձակումներ։ Նախազգուշացնում ենք Հունաստանին՝ մի՛ կրկնեք մեկ դար առաջվա սխալները և ձեզ սին հույսերով մի մխիթարեք»,- ասել էր Թուրքիայի նախագահը։
Էմմա Չոբանյան
