Հարցումների համաձայն՝ Էրդողանի կուսակցության վարկանիշը շարունակում է նվազել

«Ո՞ւմ օգտին կքվեարկեիք, եթե այսօր խորհրդարանական ընտրություններ լինեին» հարցին Թուրքիայում ընտրողների պատասխանները հաստատել են, որ մարտի 31-ին ՏԻՄ ընտրությունների արդյունքների պատկերը շարունակվում է։ Իշխող ԱԶԿ-ն, որը ղեկավարում է նախագահ Ռեջեփ Թայիփ Էրդողանը, շարունակում է հետ մնալ  ընդդիմադիր Ժողովրդահանրապետական կուսակցությունից (CHP)։

«Թուրքիայի քաղաքական իրավիճակի 2024 թվականի ապրիլյան ուսումնասիրությունը», որն իրականացվել է հասարակական կարծիքի ուսումնասիրման AREA ընկերության կողմից՝ որոշելու ընտրողների աջակցությունը քաղաքական կուսակցություններին ցույց է տալիս, որ տեղական ընտրությունների արդյունքները տարածվում են երկրով մեկ։ Հարցումն անցկացվել է 2024 թվականի ապրիլի 20-22-ն ընկած ժամանակահատվածում երկրի 26 նահանգներում և 92 շրջաններում՝ 18 տարեկան և ավելի բարձր տարիքի 3 հազար 62 մարդկանց հետ հեռախոսային հարցազրույցի միջոցով։

Արդյունքների համաձայն՝ առաջին տեղում է CHP-ն՝ 34,4 տոկոսով, իսկ ԱԶԿ-ն 32,5 տոկոսով երկրորդն է, DEM կուսակցությունը երրորդն է՝ 9,9 տոկոսով, իսկ իշխող ուժի դաշնակից MHP-ն չորրորդն է՝ 9,1 տոկոսով։

Հարցին՝ ինչո՞ւ է իշխող կուսակցությունը պարտվել ՏԻՄ ընտրություններում, որպես պատճառ տնտեսական ճգնաժամը նշել է 61,1 տոկոսը, ներգաղթի խնդիրը՝ 8,6 տոկոսը, թեկնածուների ձախողումը՝ 8,5 տոկոսը։

Նշենք, որ Թուրքիայում մարտի 31-ի ՏԻՄ ընտրությունների արդյունքներով՝ ընդդիմադիր Ժողովրդահանրապետական կուսակցությունը (CHP)  պատմական հաղթանակ է գրանցել, իսկ Էրդողանի գլխավորած կուսակցությունըմ 2002 թվականին իշխանության գալուց ի վեր, ամենամեծ պարտությունն է ունեցել։ CHP հավաքել է ձայների ավելի քան 37,76 տոկոսը, ԱԶԿ-ն՝ 35,48 տոկոսը։ Անկարայում գործող ընդդիմադիր քաղաքապետ Մանսուր Յավաշը հավաքել է ձայների 60,38 տոկոսը, ԱԶԿ-ի թեկնածու Թուրգուտ Ալթինոքը՝ 31,69 տոկոսը, Ստամբուլում գործող քաղաքապետ Էքրեմ Իմամօղլուն՝ 51,14 տոկոսը, Էրդողանի թեկնածու Մուրադ Քուրումը՝ 39,59 տոկոսը։ Իմամօղլուն Էրդողանի հիմնական քաղաքական մրցակիցն է, որը, չնայած իշխող ուժի մեծ ջանքերին, կարողացավ կրկին հաղթել Ստամբուլի ընտրություններում։

Էմմա Չոբանյան