Թուրքիայի ընդդիմադիր կուսակցությունները քննարկում են նոյեմբերին արտահերթ ընտրությունների անցկացման հնարավորությունը

Թուրքիայի ընդդիմադիր 6 կուսակցությունները, որոնք համատեղ հռչակագիր էին հրապարակել՝ ուրվագծելով 10 ընդհանուր սկզբունքներն ու նպատակները Թուրքիայում խորհրդարանական կառավարման համակարգը վերականգնելու համար, կիրակի կայացած հանդիպման ժամանակ քննարկել են արտահերթ ընտրությունների անցկացման հնարավորությունը։ Այս մասին հայտնում են թուրքական լրատվամիջոցները։

Հաղորդվում է, որ ընդդիմադիր առաջնորդները հանգել են եզրակացության, որ կառավարությունը կարող է գնալ արտահերթ ընտրությունների երկրի տնտեսական խնդիրների պատճառով։ Հավանականություն կա, որ քվեարկությունը տեղի կունենա նոյեմբերի 6-ին կամ նոյեմբերի 27-ին։

6 կուսակցությունները, ներառյալ՝ գլխավոր ընդդիմադիր Ժողովրդահանրապետական կուսակցությունը (CHP), դաշինք են ստեղծել ընդհանուր սկզբունքների հիման վրա, որոնք ուղղված են Թուրքիայում նախագահական կառավարման համակարգի վերացմանը, որը 2018 թվականին նախագահ Ռեջեփ Թայիփ Էրդողանին տվել է հսկայական գործադիր լիազորություններ։

Ընդդիմադիր կուսակցությունների ղեկավարների 4-րդ հանդիպմանը նշել են, որ իշխող ԱԶԿ-ն հրահանգել է իր կազմակերպություններին՝ «պատրաստ լինել ընտրություններին»։

Էրդողանն ամենաուշը հաջորդ տարվա հունիսին պետք է ընտրություններ անցկացնի։ Նրան աջակցությունն անկում է ապրել երկրում տնտեսական խնդիրների ճգնաժամի պատճառով։ Երկրում գնաճը վերջին 20 տարվա ամենաբարձր մակարդակին է հասել։

6 ընդդիմադիր կուսակցություններն են՝ Ժողովրդահանրապետական կուսակցությունը, ազգայնական «Լավ» կուսակցությունը, իսլամիստական «Ուրախություն» կուսակցությունը, Դեմոկրատական կուսակցությունը, նախկին վարչապետ Ահմեդ Դավութօղլուի «Ապագա» կուսակցությունը, նախկին փոխվարչապետ Ալի Բաբաջանի «Ժողովրդավարություն և առաջադիմություն» կուսակցությունը (DEVA)։ Նրանք աշխատում են ընտրություններում Էրդողանի դեմ միասնական թեկնածու առաջադրելու ուղղությամբ։

Էմմա Չոբանյան